Hevserokê Konseyê Rayverîn ê KCK’î Cemîl Bayik weçînayinê 7’ê Hezîrani sero qisey kerd û mesajê muhîmî day. Bayik vat ki, serkewtinê HDP bibo serkewtinê heme şaran.
Hevserokê KCK’î Cemîl Bayik ANF rê qisey kerd û heme kes û çoşmeyê qandê HDP şew û roj xeftiyenê silam kerdî. Bayik ard ziwan ki serkewtinê HDP’yo Tirkiye de tesîrê gird bikiro û peyniyê siyasetê înkar û çinêkerdin biyaro û wina vat: “Serkewtinê HDP, yeno mahneyê demokratîk kerdinê Tirkiye. Meseleya kurd jî miyan de, verniyê çareserînê demokratîk ê heme meseleyan akiro. Çiyê winayin jî yeno mahneyê weşîna azad. Eşkere yo, şaranê Tirkiye têkoşînê gird ramito. Enê têkoşînê de bedelê girdî dayê. Nirxê zaf bi qîmet vetê werte. Hetanî nika quwetê demokratîk heveyê vila mendî. Nika binê banê HDP de amey pê het û xo rêxistin kerd. Coka enê weçînayinan de, serkewtinê HDP, bibo serkewtinê heme quwetanê demokrasî. Serkewtinê HDP ra, heme quwetê demokrasî, quwetê çep, heme şarî, kulturî, dînî, cenî, gencî, suryanî, asûrî, keldanî, ermenî, êzidî, elewî û sunî qezenc bikirê.”
‘Raya xelisiyayinê Erdogan û AKP ra, HDP ra ravêrena‘
Bayik kesê qandê HDP xeftiyenê ra wast ki, xo biresinê heme cayan û vat: “Lazim o HDPijî xo biresinê, heme sûk, qeza, dewan û rastiyan qandê herkesî biyarê ziwan.”
Cemîl Bayik eleqe ant êrişanê vera HDP jî ser û wina vat: “Eki HDP bi quwet bikewo meclîs, heme şar, dîn û kulturê Tirkiye meclîs de ca bigirê. Çiyê winayin jî yeno mahneyê vinîkerdinê AKP û Erdogan. Bi vatena bîna Tirkiyeya Erdogan û AKP ra bixelisiyo. Tirkiye de kamo wazeno Erdogan û AKP ra bixelisiyo, gerek HDP het ca bigiro. Raya xelisiyayinê Erdogan û AKP ra, HDP ra ravêrena. Coka teniya HDP jî nê, gerek heme quwetê demokrasî û azadî qandê serkewtinê HDP bixeftiyê.”
ANF/BEDİNAN