Qezaya Bedlîs Tûxî de serranê 90 de xêlê dewî amey vengkerdiş û dewijî bi zorî ameyî koçkerdiş. Çend serran ra dima dewijî reyna ageyrayî erdê xo ser.
Dewijê dewanê Dîbeklî, Duzce Alan, Bol Alan, Kolbaşi û dewa Yaslica ke êdî êdî ageyrenê dewanê xo, bî yew hewzaya Kawarî ser 5 muxtarî ronayî. Serra 2015 de dewijan Kooperatîfê Zîreetî yê Avetax ronayî. Hedefê kooperatîfî de ronayişê ekonomîya xoser û ramitişê cuya komunal a. Kooperîtîfî rê, ê ke şitî înan esto şit, ê ke mêsê înan esto hingimênî roşenê.
Cinîye ke kooperatîfî de ca gênê bi performanseke gird xebetyenê. Endama kooperatîfî ra Leyla Akbaş ke bi karê hingimênî eleqedar bena da zonayen ke sifte ê perwerde ra ravêrîyayê. Akbaş aşkere kerd ke karê dewe merdimî zaf ezdîneno (westneno) la wexto ke netîceyê emegî yeno girewten, hîna kêfweş benê.
Cinî êşkenê heme karî bikerê
Dewijan ra Aygul Karaaslan zî da zonayen ke kooperatîf, ewilî dano cinîyan û seba awankerdişê ekonomîya cinîyan gamê ke muhîm o. Karaaslan vist vîrî ke sifte nêzanayo ke senî nezdîyê mêsanê hingimênî bibo, la bi yardimê embazanê xo yê karî a zî hinî musaya.
Karaaslan dîyar kerd ke aye zey domananê xo ewnîyayê mêsanê hingimênî zî û hina dewam kerd: “Verê coy ma qet hingimênê heqîqî nêwerd. La ez nika tepsî ke sofreyê xo rê û cîrananê xo rê dana. Dewe de kesê ke mangayê înan estê şitê ci û warê hingimênî de zî kooperatîfî rê rotî. Wexto ke mi nê karî nêkerdêne keyeyê ma zaf xirab bi û mi bi (pê) pereyê ke qezenç kerdî xo rê keye viraşt. Cinî eke biwazê senî (ça) beno wa bibo eşkenê heme karî bikerê û linganê xo ser o vinderê.”
Cinîyan wezîfe girewt
Cinîyan ra Aysel Karabey ke 1989 de dewe xo ra koçê Stenbolî kerd zî wina qalê istanika xo kerd: “Ma wexto ke dewa xo sey xirbe dî ma nêwaşt ke ageyrê. Ma keyeyê xo û hêgayê xo reyna awan kerdî. Ma bi heywananê xo eleqedar bî. Xora yew di serran de dewijî ke koç kerdbî zî peyser ameyî. Ma verên de zehmetî antî la cayêk zî nêbeno sey erdê merdimî.”
Karabey vist vîrî ke zey dinîye dewe înan dest da yew bînan û seba kooperîtîfî wezîfe girewtî û va, “Goreyê mi karê ke cinî kenê, camêrdî nêeşkeno bikero.”
ŞÛJIN/BÊDLÎS