Bado ke KCKyî seba yewîya neteweyî ya kurdan îzehet da, hetê zaf hetan ra munaqeşeyê îtîfaqê kurdan ame kerdiş. Babete ser o Parlamenterê HDPyî yê Riha Osman Baydemîrî qisey kerd.
Baydemîrî va ‘seba ke kurdî yewîya xo awan nêkerdî, dişmenê kurdan hende bîyî qewetin’ û wina dewam kerd: “Eke ewro Bagdat, Tahran, Enqera û Şam problemê kurdan hîna zafêr têmîyan kenî se, sebebê ci bêîtîfaqîya kurdan a. Semedo ke kurdî nêameyî têhet û perspektîfêko ortax awan nêkerdî yo. Vera hende hêrişan de çareserîye, ameyîşê têhet yê hêzê rêxistine yê kurdan û sîyasetê kurdan o. No seba Rojawanî zî wina yo. Ganî seba ameyoxa Rojawanî heme hetê sîyasîyî fikrêko ortax de biresê pê. Ez nêvan A, B an zî C sucdar o, la eke kurdî nêrî têhet, do azadîye ra dûrî bibî.”
Zemînêko wertex de bîrê têhet
Baydemîrî hayr ant rewşê Başûrê Kurdistanî ser zî û va: “Ez seba heme partîyanê Başûrê Kurdistanî vana, ganî zemînêko ortax de bêrî têhet. Çimkî babete lejê îdeolojîkî ra derbaz bîya; nika şarê kurd bi çinbîyayîşî ra rî bi rî yo. Ewro munaqeşeyê gelo ekonomîye do serbest bibo an ekonomîya komunî bibo yeno kerdiş û no zî çîyêko abes o. Ewro yeno waştiş ke neteweyêk çin bikerî. Eke Vakur de serbikewî o wext do verê xo bidî Rojawanî û eke ewja de zî serbikewî dima ra do serê xo bidî Hewlêr. Seba ke nêyî nêbî, ganî kurdî babeta îtîfaqê neteweyî de biresî yewbînan.”
Ganî medya rolê xo kay bikero
Baydemîrî qiseykerdişê xo de bale ant rolê çapemenîye ser û wina va: “Ganî her kurd seba îtîfaqê mîyanneteweyî partîya xo ser de zextan bikero. Heta nika ma bi rexnekerdişê yewbînan qet feydeyêk nêvînayo, nika ra pey zî ma nêvînenî. Ganî ma heme xo ra persê ‘gelo nêbîyayîşê îtîfaqê neteweyî de kêmanîya mi çik a?’ bikerî. Ganî çapemenîya Vakur, Başûr û Rojawanî zî na babete bigirî dest. Eke ma nêyî çapemenîye de bidî destpêkerdiş, o wext ma eşkenî ziwanê cîyavînayîşî orte ra wedarnî. Encex ma bi no hawa êşkenî îtîfaqê xo yê neteweyî awan bikerî.”
ANF / BRUKSEL