Rojnamegerî Omer Çelîk, Tunca Ogreten û Mahîr Kanaat seba ke maîlê Wezîrê Enerjîyî Berat Albayrakî ke hetê Redhackî ra ameybî deşîfrekerdiş, kerdbî xebere, ameybî tewqîfkerdiş û 10 aşmî ra zêde yo ke tewqîfkerde yî. Rojnamegerî ewro do bivejyî mehkeme. Babete ser o rojnamegerî qisey kerdî û reaksîyon nîşan dayî.
Rojnamegeran ra Kumru Başere va ‘merdimî sucdarbîyayîşî ra ver yenî cezakerdiş’ û wina domnaye: “Belgeyê ke xebera înan ameye viraştiş, zaf muhîm î. Welatanê bînan de xelate danî nê xeberan. Nimûneyê winasî tewr peynî Amerîka û Engilistanî de ameyî cuyayîş. Labelê ma de rojnamegerî 10 aşmî yo ke tewqîfkerde yî. Ganî derheqê nê rojnamegeran de beraat bidîyo.”
Derhênerê Pêroyî yê Rojnameyê Evrenselî Fatîh Polatî zî dîyar kerd ke rojnamegerî vera îqtîdarî de bêpawitiş î û wina va: “Ma prosesêko winasî de ancax eşkenî bi piştîdayîşê yewbînan bi hawayo bihêz bivinderî. Cok ra ganî herkes hetê rojnamegeran de ca bigîro û înan tena nêverdo.”Çira înan rê birîyena?
Rojnamegere Banu Guvene zî wina va: “Çîyê ke maîlê wezîrî ra vejîyayî babeta munaqeşeyê ke mîyanê partîye de bêrî kerdiş î. Çira faturaya ci rojnamegeran rê birîyena. Senî embazê ma yê rojnamegerî seba ke nê melumatê ke mîyanê maîlî de estbî, înternet ra girewtî, yenî sucdarkerdiş. No vera azadîya çapemenîye rê tehdît o.”
Heto bîn ra muxabîrê JINNEWSî Duygu Erole û Habîbe Erene ke 20ê Teşrîna verêne de ameybî tepiştiş, îfadeyê xo yê dozgerî ra dima serbest ameyî veradayîş.
NAVENDA XEBERAN