Bi şîrikatîya AKP û MHPyî tuzuko zereyîn Meclîs ra derbaz bî. No tuzuk bi hawayo ‘bêvengkerdişê muxalefetî’ yeno hesibnayîş û heta nika xeylê munaqeşeyî ser o ameyî kerdiş. Babete ser o Unîversîteya Mêrsînî de Prof. Dr. Atîlla Guneyo ke îmzekerdişê vilaweka aştîye ver amebî îxraçkerdiş, qisey kerd.
Guneyî va ‘bi nê tuzugî parçeyê destpironêginayîya ke mendbî zî ame wedarnayîş’ û wina domna: “Meclîs tena cayê qanûnviraştişî nîyo, eynî wextî de cayo ke fikrî yenî vatiş o. Bi bedilnayîşê tuzugî çîyê ke nîmcet mendbîy ameyî temamkerdiş. Sere de destpironêginayîya parlamenteran bi temamî ameye wedarnayîş.”
Beno ke bêro padayîş
Guneyî dewamê qiseykerdişê xo de va ‘bi nê bedilnayîşî Meclîs de munaqeşekerdiş hema vaje bi temamî ameyo wedarnayîş’ û wina da dewam kerd: “Bêxera otorîterbîyayîşî sewbîna ti manaya nînan çin a. Siba beno ke dormeyê kursîyê Meclîsî zî bi barîyeran bêro padayîş. Şert û mercê kaos û krîzî de provakatoro tewr gird îqtîdar bi xo yo. Ganî ma fek çalakî û muxalefetîya aştîwaştoxe ra vera nêdî.”
DÎHABER/MERSÎN