ZEYNEP DURGUT / WAN
Îlankerdişê Xoserîya Demokratîke ra dima şarê Sûrî bi aşman xover da. No çend aşmî yo ke dewlete taxê Alîpaşa û Lalebeyî yê qezaya Sûrî ya Amedî de dest bi rijnayîşê keyeyê welatîyan kerda. Şar vera rijnayîşî de xover dano û keyeyanê xo nêterikneno.
Babete ser o dayîkê Wanî qisey kerdî û vera rijnayîşî de reaksîyon nîşan dayî.
Dayîka bi nameyê Besna Akdogane va ‘Sûr cayêko tarîxî yo û şar destûr nêdano ke qeleya xoverdayîşî bêro rijnayîş’ û wina domnaye: “Rijnayîşê Sûrî çinîhesibnayîşê tarîxî yo. Seba ke şarê Sûrî xover da, nika Sûrî rijnenî. Çimkî mudaxaleyê estena şarî nêkenî. Cereyan û awa şarî ameyî birnayîş. No nîno qebulkerdiş. Wa herkes destê xo rono wijdanê xo ser de. Şarî ser de koçberî ferz kenî. Hedefê înan o yo ke Sûrî veng bikerî. Şarê Sûrî tepîya game nêeşt û vera nê zulmî de xover dano. Ganî tena şarê kurd nê, herkes wayîrê Sûrî bivejîyo. Wa dewlete destê xo Sûrî ra bianco. Ganî ma vera nê zulmî de bibî qalxan.”
Wayîrvejîyayîşê Sûrî wayîrvejîyayîşê ameyeyî yo
Xemê Akdogane zî va ‘dewlete estena Sûrî ra eciz a’û wina domnaye: “Xoverdayîşê Sûrî qet nîno vîrîkerdiş. Xoverdayîşê Sûrî seba heme şarî bîyo hêvîya azadîye. Nika dewlete mecbûr menda ke Sûrî birijna. Ganî ti kes rijnayîşî temaşe nêkero. Wazenî bi rijnayîşê Sûrî destê xo dergî heme Kurdistanî bikerî. Labelê wa baş bizanî ke şarê kurd her tim xover dayo û ti car vera zulmê dagîrkeran de sere nêronayo. Wayîrvejîyayîşê Sûrî, wayîrvejîyayîşê merdimîye yo.”