19ê Tebaxe de şaredarîyê Amed, Wan û Mêrdînî ameyî xespkerdene û herinda hemşaredaranê HDPyî de qayûmî ameyî tayînkerdene. Tayînbîyayîşê qayûman ra nata Kurd û hetê demokrasî çalakîyan de yî. Bitaybetî bajarê ke qayûmî tayîn bîyî û Ewropa de çalakîyî bêmabên dewam kenî.
Ewropa de paytextê Almanya Berlîn û bajarê Marsîlya yê Fransa de kurdistanijî û dostê înan kuçeyan de bî. Çalakîyan de xespkerdişê şaredarîyanê Amed, Wan û Mêrdînî ame şermezarkerdene. Çalakîya Marsîlya ke bi seyan kesî tewrê ci bîyî hêrişê dewleta Tirkî yê vera Kurdan de ameyî şermezarkerdene. Qiseykerdişanê mîtînge de ame vatene ke dewleta Tirkî bi zext û hêrişan wazena ke heme heqanê Kurdan dest ra bigêro. Mîtînge bi siloganan qedîyaye.
Paytextê Almanya Berlîn de zî vera bevengîya welatanê Ewropa yê vera xespkerdişê şaredarîyanê Kurdan çalakîya bêvenge ameye viraştene. Çalakgêran bi dovîz û pankartan xespkerdişê şaredarîyanê Amed, Wan û Mêrdînî û vera naye bêvengîya Ewropa şermezar kerdî. Çalakîye de bale ameye antene serê qetlîyamanê ke tebîetê Kurdistanî de yenê kerdene ser û hukmatê Almanya ra ame waştene ke wa paştî nêdo dewleta Tirkî. Çalakîye bi vilakerdişê vilawekan qedîyaye.
BRUKSEL