Tarîx ra nata vera elewîyan de polîtîkayê qirkerdiş, asîmîle û sewbîna estî. Bitaybetî heta nika qetilkerdiş û cîyakarîyê ke vera elewîyan de yenî kerdiş, resayî dûştêko berz. 

Tewr peynî Meletî de 2 rojî verê 13 keyeyê ke elewîyî tede mendênê, berê înan bi xêzkerdiş ameybî nîşankerdiş. Babete ser o taxijan ra Elîf Dedeogluye va ‘Ganî yê ke beran nîşan kenî bi hawayo rew bêrî dîyayîş’ û wina dewam kerde: “Ma elewîyan bi mergî tehdît kenî. Eke ê vanî qey ma do bitersî, şaş î. Ma do tîya de bibî. Ma heta nika nêtersayî û ma do nêtersî zî.”

Goncagul Mîlîse zî dîyar kerde ke ê xêzkerdişî polîsan ra musayî û wina va: “Bi no hawa mesajê ‘ma do şima bikişî’ dîyeno elewîyan. Ganî selahîyetdarî lezabez bikewî mîyanê têgêrayîşî.”


Ma nê muameleyî heq nêkenî

 Fatma Gungore zî arde ziwan ke seba ke elewîyan mêyanê komelî de cîya bikerî, wina kenî û wina dewam kerde: “Serê sibayî polîs ame û va ‘berê şima ameyo nîşankerdiş’. Ez ewnîyaya ke heme berê taxe ameyî nîşankerdiş. Nê nîşankerdişî nêşênî ma rayîrê ma ra bigîrî. Polîsan ma ra ver beranê ma ferq kerdî. No zî sereyê merdimî de beno pers. Eke kerdoxî nêvejyî, berpirsîyar hukmat o.”

Yuksel Kaline zî qiseykerdişê xo de va ‘berpirsîyar polîs o’ û wina domnaye: “Se beno wa bibo, ma do nasname û têkoşînê xo ra fek veranêdî. 3 rojî verê zabitayî ameyî kewtî mîyanê tayê keyeyan, kontrol kerdî û vejîyayî. Wexto ke ma pers kerd, çîk nêvatî. No zî yeno manaya ke ê tetbîq kerdî. Cok ra berpirsîyar polîs î.”



Ganî ma vera hêrişan de bibî yewe

Babete ser o Komeleya Kulturê Elewîyê Pîr Sultan Abdalî (PSAKD) îzehetêk daye û vera nê hêrişan de reaksîyon nîşan daye. 

PSAKDî îzehetê xo de dîyar kerd ke reyna ‘domanî başî’ karî ser o yî û wina va: “Nê rojê ke ma amadekarîya yadkerdişê canê xo yê Qetlîyamê Gurgumî kerdêne, Meletî de berê cananê ma ameyî xêzkerdiş. Ma nê hêrişan ver şaş nêbîyî. Çimkî reya sifteyîne nîyo ke ma raştê çîyanê winasîyan yenî. Verê cû Erzîngan, Dîlok û Semsûr de ma dî. Wexto ke Semsûr de bî, Wezîrê Karê Zereyî vatbî ‘domanî kerdî’. Dima ra qeydê kamerayî ameybî pakkerdiş û kerdoxan pawitbî. Labelê wa bizanî ke ma nêtersenî. Ganî ma verê hêrişan de sey ke Haci Bektaşi Velîyî zî vato ‘ma bibî yewe û ma bihêz bibî’. Ma do heta ke hêrişkarî bivejyî orte, nînan taqîb bikerî.” 


MERKEZÊ XEBERAN