Serra 2002 ke AKP bî hukimat û heta nika bi mîlyonan kes hetê hukimatê AKPe ra ameyî deqkerdiş. Taybetê wextê tifaqê ke mabênê AKP-Cematê Fethullah Gulen de xeylê kesî hetê her di hetan ra zî seba menfîetê xo ameybî deqkerdiş û xeylê rayan no bi belgeyan zî vejya werte.Tewr peynî pêroyînameyêkî bi nameyê ‘Derheqê Xebatkarê Kes û Sazîyê ke Ewleyîya Neteweyî Tehdît Kenî’ û bi îmzeyê Serekwezîr Ahmet Davutoglu ame weşênayîş. Derheqê no pêroyîname de pawitox Tugay Bek û Hemserekê Komeleya Heqê Merdiman a Edene Îlhan Ongor ke vînayîşê xo ardî ziwan.
Seba bêvengkerdiş o
Pawitox Tugay Bek derheqê pêroyîname de bertekê xo mojna û wina verdewam kerd: “Pêroyînameyê ke bi nameyê ‘Derheqê Xebatkarê Kes û Sazîyê ke Ewleyîya Neteweyî Tehdît Kenî’ û bi îmzeyê Serekwezîr Ahmet Davutoglu ame weşênayîş reyde wazenî bê bira dadgehî têkîlîya xebatkarê rayapêroyî bibirnî û karî ra bidî durvistiş. No pêroyîname reyde di eslê xo de wazenî kesê muxalîf bêveng bikerî û badê zî tasfîye bikerî.”
No dûştê qanûnî yo
Hemserekê Komeleya Heqê Merdiman a Edene pawitox Îlhan Ongor zî dîyar kerd ke ti meşruîyetê pêroyîname çin o û qalîkerdişê xo wina da domnayîş: “Karîneya masumîyetî bingeyê huqiqê gerdunî û makeqanûnî ya. No semedî ra bê bira dadgehî derheqê karmendan de kerdişê heme pratîkî dij qanûnan î û qet nînî qebulkerdiş.”
Dewlet wazena împaratorîya tersî înşa bikero
Pawitox Ongorî qiseyanê xo de ciresna ke bi no pêroyîname reyde wazenî muxalefetê komelkî bêveng bikerî û qalîkerdişê xo wina peynî kerd: “Dewlet wazena împaratorîya tersî awan bikera. Dûştê rayvistbîyîşê muxalefetê komelkî bi xebetnayîşê hêzê rayapêroyî wazena bipelçiqna. Bi taybetî îtham û lomeyan reyde derheqê karmendan de cezayê dîsîplîn û surginî yenî dayîş.
Hukimatê AKP bi zîhnîyetê ‘ê ke burokrasî destê xo de bitepişo, dewlete zî destê xo de tepişeno’ têgêreno û wazeno heme burokrasî destê xo bigiro û hemînan bikero AKPyij.”
DÎHA/EDENA