Dewleta Tirk, a ke rejîmê xo ser qetlîaman ronayo, îmze eşt bin jû qetlîamê da bîn. Bi desan kesê ke bodrimanê ciya yê Cizîr de bî, bi kîmyasal amey qetilkerdin. 

Qenala Televizyon yê Dewlet TRT, seatanê şan yê Yewşem de qetilkerdişê bi desan kesan zey ‘xebera deqeya peynî’ weşîna. Xeber de vajiya ke, Cizîr de vera bana ke dirbetinî miyande bî operasyon viraziya û 60 kesî kişiyay.  La badê çend seatan TRT na xebera xo peyser ant. Walitiyê sûk zî homarê kiştişan zey 10 kesî da. 


Sifte teqînayiş bi 

Goreyê hayderiyê ke herem ra amey, mavêna seatanê 17.00 û 18.00î de herem ra teqînayiş ame, la vengê tifingan nêame. 

Parlamenterê HDP yê Şirnex Faysal Sariyildiz’î kî vist vîrî ke Cizîr de sifte teqînayişê gird qewimî, peycoy zî îdiayê da winayin eştî werte. Sariyildiz’î da zonayene ke, banî 52 kesî û 10 cenazey estbî. 


Hesabê ci do bîro persayiş

Hemserokê DBP Kamûran Yuksek’î zî aşkere kerd ke, AKP îtifaqê herbî ronayo û qetlîamî ra piya her çî giroto ver çiman.  Yuksek’î hayr ant qetlîamê vera dirbetinanê taxa Cûdî ser û wina va: “Keyeyê sifte de 7 cenaze ra piya, 26 dirbetinî estbî. Keyeyê bînî de zî 60 dirbetinî estbî. Gurekaranê weşî zonayişî day ke, bi desan cenaze erdî de yê. 

Yuksek’î ard ziwan ke, dewlet wazena cenazeyan sewqê Meletî bikero. Kamûran Yuksek’î vist vîrî ke, badê nêrazîbiyenan homarê kiştişan vurniyenê û ard ziwan ke qûwetanê dewlet înfaz û qetlîamê da gird viraşto. Yuksek’î ard ziwan ke, hesabê qetlîam do bîro persayiş. 




Hesabê ci do bîro persayiş


Vera qetlîama Cizîr xeylê cayan ra aşkere kerdiş amey. Aşkerekerdişan de vajiya ke, hesabê qetlîam do bîro persayiş. 

Hemserokîna Konseya Rayverîn yê KCK qetlîama Cizîr lanet kerd û aşkere kerd ke, heyfê her jew şehîdî do bîro persayiş. KCK vist vîrî ke, hikûmeta AKP bi tanq û topan erzena sûkan ser, kuçeyan bombevaran kena, taxan rijnena, sûkan îşgal kena. Damustayin de vajiya ke, AKP sûcê merdimanî kena û hayr ant qetilkerdişê dirbetinanê Cizîr ser. KCK da zonayene ke, gore zonayişê ke înan girotî, bi desan kesê dirbetin amey qetilkerdin. KCK kesê ke weşiya xo kerdî vinî vîrard û aşkere kerd ke, heyfê her jew şehîdî do bîro persayiş. 


Qetlîam çilka peynî ya 

Kordînasyonê KJK derheqê qetlîama Cizîr de jû damûstayin da. KJK aşkere kerd ke mesûlê qetlîam Erdogan û Davûtoglû yo û vist vîrî ke vera qetlîam hinî bêvengmendiş nêbeno. Kordînasyonê KJK da zonayene ke, îxtidara AKP, îxtidarê da tewr gonîn û faşîstîn yê tarixê Tirkiye ya ke vera şaran, ceniyan û bindestan herb kena. KJK aşkere kerd ke, no herbê AKP de, raybazê qilêrîn yê  rejîma faşîstîn yê derbeya 12ê Îlone ra hona gird şixûlnena. Bi nay AKP vûrniya rejîmê da qirkerdin. Damûstayin wina dewam kerd: “Xeberê qetilkerdişê kesê ke bodrimê jew keye de bî, çilka peynî ya. No kerdişê vera dirbetinan sûcê herbî yo. Mesûlê no sûcî Tayîp Erdogan û Ahmet Davûtoglû yo”.


Hesabê ci do bîro persayiş

KJK vist vîrî ke AKP bi polîtîkayanê qirkerdinan wazeno vera civakî teror biramo, împaratoriya ters rono û wina va: “Pêrokîn êrişê AKP tenya hêrs û nêrazîbiyenê şarê Kurd kenê jêde. ‘Plana Master’ ke AKP tewr peynî de aşkere kerd fîyasko ya. Dewamiyê polîtîkayanê qirkerdin o. Îlanê qediyayişê AKP yo. Çike şarê ma, ceniyê ma dê na plan û qetlîaman qet qebûl nêkerê. KJK vist vîrî ke, ceniyan, dew, tax û barîqatan de, vera zihnîyeta faşîstîn ya serdest bin banê YPS-Jin de cayê xo giroto û aşkere kerd ke hesabê pêrokîn qetlîaman do pîro persayiş. 


Kurdî peyser gam nêerzenê

Kordînasyonê KJK veng da Kurdistanijê ke metropolanê Tirkiye û Awrûpa de cuwyenê û waşt ke her ca de werzerê nûmayişan. Hereketê Ceniyan aşkere kerd ke, vera wehşeta Cizîr bêvengmendiş nêbeno û wina vajiya: “Ganî ti wext Cizîr tenya nîro viradayen. Wa pêrokîn şarê ma çormeyê Cizîr de bibo jû. Ganî çormeyê demokrasî û azadîwaşt kerdenanê faşîst yê AKP rê vajo vindere! AKP se kena wa bikero, nêşkena şarê Kurd rê peyser gam bido eştiş. Tekoşînê heqdar yê şarê Kurd do serkewo. 


Sûcê merdimatî yo

Vera qetlîama Cizîr jû vengdayena protestokerdiş zî KCD-E ra amê. KCD-E veng da Kurdistanijanê ke Awrûpa de yê bivejyê meydanan.KCD-E vist vîrî ke dewleta kolonyalîst yê Tirk, şexs dê Cizîr de reyna şarê Kurd qetil kerd.  Damustayin de vajiya ke, AKP bi aşmano Kurdistan de sûcê herbî ramena û wina va: “Goreyê xebera ke Cizîr ra amê, vajiyeno ke 60 kes bi kîmyasal ameyê qirkerdin. Çapemeniya AKP zî nay zey ‘serkewtiş’ aşkere kerd. 

KCD-E vist vîrî ke AKP ya faşîst, dustê xoverdayişê şarî bi raybazanê xeyrî exlaqî û bêhiqûqîn qirkerdin viraşto û aşkere kerd ke vera na qetlîam bêveng mendiş însanbiyîn ra vejyayiş o, wertexbiyayişê qetlîam o. KCD-E veng da Kurdistanijanê Awrûpa ke bi rihê ‘Her ca Cizîr, her ca Sûr, her ca xoverdayiş’ bivejyê kuçeyan. 


Bivejyê meydanan

Hereketê Ceniyanê Kurd yê Awrûpa TJKE zî qetlîama Cizîr rê nêrazîbiyen damusna û vengê berzkerdişê xoverdayiş da ceniyan.  TJKE aşkere kerd ke, ver çimandê pêrokîn dinya de wehşetê bodrimê newî qewimenê. Hinî însanê ma bi tifinganê kîmyasal bi komî yenê kişten.  TJKE vist vîrî ke, wehşeto ke bi zihnîyetê DAIŞ Cizîr de viraziya qirkerdin o û encex bi tekoşîn êşkeno bîro vindernayen û niya va: “Ganî nûmayişê girdî viraziyê û dewam bikerê.

TJKE peynî de veng da pêrokîn ceniyanê Kurd û dostanê ci ke vera wehşeta dewleta Tirk bivejyê meydanan.   


 NAVENDÊ XEBERAN