Bi ferasetê polîsî têgêrêna

 “Eke AKPe no polîtîkayê xo de israr bikera do no hukimat zî zey hukimatê bîn dîrok de cayê xo bigêro. AKPe wazena bi qirkerdişan netîce bigêra labelê no waştişê AKPe ra do Newroze de şarê kurdî bi xoverdayîşî verpers bibo.”

Projeyeke newe nîya

Wekîlê HDPe yê Amedî Baluken dîyar kerd ke na projeya AKPe demo vîyarte de zî ame şuxilnayîş la netîce nêgirewt, nika AKPe na proje zey ke newe ya şarê Tirkîya ra nîşan dana û wina domna: “Wezîrê Karê Zerrî Efkan Ala zî zaneno na proje reyde netîce nîno girewtiş. No nêzdîbîyîşê AKPe nîşan dano ke do rojê ameyox de zî konseptê şerî bidomyo. 6 aşma ke hukimatê AKPe Kurdistan kerdo warê şerî, nika eynî hukimatê AKPe hewna bi nameyê şarê kurdî biran gêno la şarê kurdî do no konseptê AKPe qebul nêkero û xoverdayîşê xo nîşan bido.”

Warê demokrasî yo

Baluken bal ant ser Kurdistan de îxlalê heqê merdiman û qalîkerdişê xo ra wina dewam kerd: “Nika navenda şaristanî de qedexeya vejyayîşê teberî yeno şuxilnayîş. Binê nameyê qedexe de dewlemendîya Kurdistanî talan kerdî û tewr sifte heqê merdiman ê weşî, cuya û perwerdeyî xesp kerdî û no zî nîşan dano ke AKP çiqas huqiqî ra fam kena. AKP nika wazena bi nê proje û konseptan zilm û qirkerdişanê ke kerda meşrû nîşan bida.”

Wazenê pasîf bikerî

Baluken seba waştişê hawanayîşê destnêdayîşîyê 5 wekîlê HDPe ser zî îzeh kerd ke cayê ke zilm esto se uca de serehewanayîş zî ganîya xoza ya û qalîkerdişê xo wina peynî kerd: “Nika Tirkîya de tena HDP, dijî AKPe têkoşîn dana, AKP wazena bêvengkerdişê HDPe reyde polîtîkayê xo yê zilmî dinya û Tirkîya ra binimma. AKP seba no zî navenda HDPe da adirî ver, mîtîngê HDPe de bombeyan da teqnayîş. AKP wazena zey partîyê bînan, HDP zî beşdarê polîtîkayê xo yê şerî ra bikera. Xora destnêdayîşîyê wekîlê HDPe çin o, ma kam çalakî ra beşdar bibî polîsî bi aşkera ma hedef gênî. Nîqaşê destnêdayîşê HDPijan daxî nîşan dano AKP çiqas HDPe ra tersena. Ganî Tirkîya newe ra hewaya aştî bandorker biba, no zî newe ra destpêkerdişê ravêreyeya çareserî ra vîyarena.”