Her çiqas ke Newala Alakirî ya qezaya Kumluca ya Antalya sey cayê SÎTî ke Rêjeya Yewine ya Tebîî bêra îlankerdiş zî Çemê Alakirî ser de viraştişê 4 Santralê Hîdroelektrîkî (HES) ra dima înşaatê 5. Yê HESî zî dest pêkerd. Projeyê Derekoyî hetê şîrketê REÎSî ra virazîya û serra 2010î de qerarê ‘raporê ÇEDî lazim nîyo’ amebî dayîş. Badê qerarî reaksîyonî virazîyayî û serra 2016î de Newala Alkirî bi qerarê 1078. sey SÎTo 1. ame îlankerdiş û qerarê pawitişî ame dayîş.
Babete ser o Zerrîwaştoxa Waye û Biratîya Çemê Alakirî Tugba Gunale qisey kerde.
Gunale qiseykerdişê xo de wina va: “Newale ser de viraştişê 8 HESan yeno plankerdiş. Nê HESan ra 1 raporê ÇEDî ra muaf ame girewtiş. Goreyê raporê ÇEDî viraştişê 3 HESan zî rîskin o. Hende raporê nêviraştişî estî, labelê reyna zî xebatê viraştişî qet nêvindenî. Newala Alkirî ser de xeylê bêhuqûqî yenê kerdiş. Seba wedarnayîşê nê bêhuqûqîyan ma muracatê xeylê cayan kerd û ma dozî akerdî. Dozê ke ameyî akerdiş hetê ma ra yenê şopnayîş. Viraştişê HESan bi hawayo bêhuqûqî dewam keno.”
Ma do têkoşîn bidî
Gunaye dewamê qiseykerdişê xo de va ‘viraştişê 4 HESan ra dima nîmeyê newale çin bî’ û wina qedênaye: “Heme darî wişk bîyî. Çemê Alakirî xeylê muhîm o. Eke çem ser o HESî bêrî viraştiş do newale çin biba. HESan ra gandar û hemwelatîyê dorme de cuyenî, tesîr benê. Viraştişê Çirrê Kurşunlu zuwa bî. Seba ke netîceyêko winasî nêwejîyo raşte ma do heta peynî seba Newal û Çemê Alakirî têkoşîn bidî.”
ANTALYA - DÎHABER