Qezaya Şirnex Cizîr de par aşmanê zimistanî de, wextê xorayverînan de 150 ra vêşêr welatijî amey kiştiş. Derheqê kiştişan de Serdozgerîyê Komarî yê Cizîrê de gerre yê sûcî ame kerdiş û heta nika derheqê 31 gerreyan de bi behaneyê “Sebebê goreyê hiqûq estê” qerarê taqîpnêkerdişî ame dayen.Pawitox Newroz Ûysal derheqê qerarê taqîpnêkerdişî de qisey kerd û vist vîrî ke, cipersayîşê ke amey akerdiş de, hurendîya vînayîşê sûcdaran, hewldayena rewakerdişê sûcî esto.
Ûysal vist vîrî ke hona zî kamîya 35 kesê ke cêrzemînan de amey qetilkerdiş nêameyê tespîtkerdiş û va, qedexe ra dima, dozgerî 244 dosyayê cipersayîşî akerd. Ûysal hayr ant raporanê cipersayîşê cayê bîyayîşî û va: “Wextê weşanê ganî de tayî noqteyanê cêrzemînan ra welatijan zonayîşî day. La raporanê cipersayîşê cayhe bîyayîşî de zî, yeno îdiakerdiş ke cenaze zaf belavila ameyê dîyayîş. Parçeyê tayî cenazeyan cayanê pêra dûrî de ameyê dîyayîş. Ganî parçeyê cenazeyekê eynî ca de bîro dîyayîş.”
‘Îdiayî dosya de çin î
Ûysal, îşaretê ci kerd ke dosyayê cipersayîşî de tenya belgeyê cayê ke yeno îdiakerdiş ke peywirdarê muduriyeta polîsan cenaze dîyê estê û va cipersayîş bi ziwaneke krîmînal ameyo kerdiş.
Ûysal, destnîşan kerd ke veşnayîş û texrîbata ke bedena kesê ke weşîya xo kerdo vinî nêameyê cipersayîş û dîyar kerd ke îdiayê derheqê kîmyasalî de zî nêameyê cipersayîş.
Ûysal ard ziwan ke armanca ewilî yê qerarê taqîpnêkerdişî no yo ke, kesê ke amey kiştiş zey "endamê rêxistin" damûsnê û wina dewam kerd: "Sivîlê ke hewl day ke ewja ra vejîyê, domanê 14 serrî, kalê 50 serrî, û kesê ke ewja de meymanî bî. Yeno îdiakerdiş ke pêroyî endamê rêxistinî yê. Yanî kesê ke şer kerdî û sivîlan pêra nêabirnay. Kesê ke ewja de bî, name bi name amey zanayîş. Ti vanê qey hedefê ewil yê cipersayîşî herkesî zey "endamê rêxistin" damûsnayîş o.
‘Delîlê ke çin î ameyê viraştiş’
Newroz Ûysal, vist vîrî ke cipersayîşê cayê bîyayîşî goreyê qanûnan nêameyo kerdiş û delîlî ameyê çinkerdiş. Ûysal dîyar kerd ke dewlet tim mîyanê eynî refleksî de ya û wina dewam kerd: “Delîlê ke çinbîyê viraştîyê. Qetî ganî îfadeyanê nimite nîrê esasgirewtiş. Nê şahidê nimite dê senî rîbirî bîrê. Teşhîs zey delîlê teqez nînê vînayen. Seba qada mîyannetewî de problemeke qanûnî nêvejîyo, ganî ser merdişan wina nîro girewtiş. Sebebê wina bi lez û bez dayîşê qerarê taqîpnêkerdişî no yo ke, dosya wazenê rojdem ra bivistnê.”
‘Çima kesek zî bi dirbetin nêame tepiştiş’
Ûysal ard ziwan ke raşt nîyo ke merdiş ser esasê “pawitişê rewa” bîro damûsnayîş û derheqê îbareyê “quwetêko bi nisbet ame şixulnayîş" de persê, “Veşo ke ewja de vejîya, netîceyê topanê quwetanê ewlehî de vejya? Yan zî durumêko cîya esto? Çima veşo ke bi çiman ame vînayen nêame tefênayene? Çima dozgerî derheqê veşî de îzahat nêda? kerd. Ûysal vist vîrî ke bi quwetêko bêsînor raya mehkemekerdişî amê girewtiş û wina va: “Heqê weşîyê yê însanan ameyo îxlalkerdiş. Helbûkî wezîfeyhe tekane yê dewlet, pawitişê welatijanê xo yo. Endamê rêxistin bo zî, ganî dewlet hewl bido ke înan bi saxî bitepşo. Eke quwetêko bi nisbet bo, çima kesêk zî bi saxî nêame tepiştiş. Çima ser cenazeyan de rêçê bi desan guleyan estê?”
Ûysal ard ziwan ke çîyê ke Cizîr de qewimyay parçeyekê plana sistematîkî yê û wina va: Dozgerê ke şî cayanê bîyayîşî, leşker û fermandarê ke nê çîyan kerdî, operasoyê FETO ra ameyê girewtiş. Wa kes qilifê FETO nê qewimyayîşan ra nêkero.
‘Teblîxatî malbatan rê rişenê’
Ûysal, ard ziwan ke îtirazê înan yê seba qerarê taqîpnêkerdişî ramenê nê zanayîşan da: “Ma tayî dosyayê ke ma riştî Mehkemeya Qanûna Bingehîn û Mehkemeya Heqê Mordeman ê Ewropa . Seba ke vernîya raya îtirazî bigîro, dozger qerarî hurendîya pawitoxan teblîxê malbatan keno. Ganî pêro malbatî teblîxatê ke resayî înan, biresnê pawitoxan.”
DÎHABER/ŞIRNEX