Endama Koordînsayonê KJKyî Besê Erzîncane derheqê grevê vêşanî, wayîrvejîyayîşê şarê kurd û cinîyanê kurd yê Newroze, Roja rojbîyayîşê Rayberê Şarê Kurdî Abdullah Ocalanî de qisey kerde.

Erzîncane va ‘Newroze vera zulm, neheqî, koletî û qralo zalim Dehaqî de bi rayberîya Kawayanê asinkaran de tim ame cuyayîş’ û wina domnaye: “Bi awanbîyayîşê PKKyî zî bi rayberîyêka hemdem û azadîwaştox newe ra ganî bîye. Adirê Newroze bi serewedaritişê cinîyan yê serranê 90î de yewna rey gur bî. Her çiqas ke Vakurê Kurdistanî de OHAL ame îlankerdiş û zext û tedayê xeylê girdî erzîyayî dewre zî şarê kurd û bitaybetî zî cinîyê kurdan 8ê Adare û 21ê Adare Roşanê Newroze bi hawayêko bicoş pîroz kerdî. Sifteyîn 8ê Adare bêvengîye xira kerd û dima ra Newroze bi hawayo bicoş ame pîrozkerdiş. Ma eşkenî bi hawayo zelal vajî ke cinîyan mora da adara 2017 ro. Wendekarê Muzîkî Kemal Kurkutî zî şexsê xo de xoverdakarîya ciwanê kurdan nîşan da. Şarê ma bi pirkerdişê warê Newroze cewabêko gird da hêzanê faşîstî yê dewlete.”


Şar bi hawayo xurt qîra

Erzîncane dewamê qiseykerdişê xo de dîyar kerde ke emser pêroyî Kurdistan de Newroze bi hawayo xurt ame pîrozkerdiş. Rojhelat de, Başûr de û sewbîna xeylê cayan de Newroze bi hawayo xurt derbaz bîyî. Rojhelat de her ke şono hişyarbîyayîş û averşîyayîşêk beno. Yewna rey Newroza Qendîlî bîye sembolê yewîya neteweyîye. Şarê ma bi hawayo xurt wayîrê tevger û Rayberîya ma vejîya û rasteyan de bi qerardarî azadîye qîrayî. Newroze de şehîdê xoverdayîşê xoserîye rê bi hawayo gird wayîr ame vejîyayîş û bi no hawa waştişê dagîrker û dewletanê statukoperestan qirika înan de mend.” 


Sîyasetê înan veng vejîya 

Erzîncane qiseykerdişê xo de qala Newroza Rojawanî zî kerde û wina va: “Rojawan de modelê cuyêka newe şekil gêno. Bi nê modelî sîyasetê parçekerdişî ke têvernayîşê bawerî û dînan reyde yeno viraştiş zî veng vejîyeno. Bawerîya şarî bi zîhnîyetê yewîye ave şono. Netewe dewlete hetê yewîye de şaran teber keno, helêneno û asîmîle keno. Şorişo ke Rojawan de aver şono cîya yo. Şorişê Rojawanî yeno manaya averşîyayîşê modelê cuyayîşo azad û seyyewbînanî yo. Minbico ke tede xoserîya demokratîke ameybî îlankerdiş de pîrozkerdişê Newroze yeno na mana. 


Ê embazan rayverî kerdî 

Erzîncane derheqê grevê vêşanîye de zî wina va: “Grevê vêşanîyo ke hepisxaneyan de ameyo destpêkerdiş zî her ke şono gird û hîra beno. Tarîxê têkoşînê azadî de cayê xoverdayîşê hepisxaneyan cîya yo. Zaf rayan xoverdayîş û çalakîyê hepisxaneyan şîyayîşî dîyar kerdo. Mazlum Dogan, Hayrî Durmuş, Sakîne Cansize û sewbîna embazan mîrasê hepisxaneyan awan rê rayberî kerdo. Embazê ke dest bi grevê vêşanî kerdî, ameyî sînorê mergî. Ez xoverdayîşê hemînan silam kena. Embazan prosesêko winasî ke vera Rayberî, şar û gerîla de hêrişî estî de canê xo eştî orte û çalakîyêka zehmetin dayî destpêkerdiş. Ganî grevê vêşanî ke hepisxaneyanê Şakran, Edîrne, Sîncan, Menemen, Wan û sewbîna de ameyî destpêkerdiş rê, sere de cinîyî û heme şarê ma bi ruhê Newroze wayîr bivejyî û têkoşînê hepsîyan bikirêşî ziqaqan zî.”


Rojbîyayîş muhîm o 

Erzîncane bale ante Rojbîyayîşê Rayberê Şarê Kurdî Abdullah Ocalanî ser û wina va: “4ê Nîsana emserên zaf cîya yo. Çimkî Rayberîya ma bi kerdişanê zaf cîya-cîyayan rî bi rî maneno. Îttîfaqo faşîst yê MHP û AKPyî seba ke bişînbo polîtîkayanê hakim bikero, polîtîkayê tecrîdî meşneno. Rayberîya ma nê şert û mercan de xover dano. Rayberîya ma têkoşînê xo sey vatişo ke 8ê Adara 2000î de ardbî ziwan ‘Ez bi bedelê Prometeusan de têkoşînê xo dana’ dano. Rayberîya ma heme hêzê ke şar û cinîyan ra ameyî girewtiş, wazeno bi têkoşînê xo nê hêzan peyser bido înan. Sîstemê camêrdîyo ke panc hezar serrî yo hakim o, vera Rayberîye de birikin o. Tevger û şarê ma perspektîfê azadî yê Rayberîye rewna fam kerdî. Cok ra roja rojbîyayîşê Rayber Apoyî rojbîyayîşê şarê kurd, şaranê bînan, dînanê bînan o. ” 


Ma sozê berzkerdişê azadîye danî

Erzîncane va ‘Rayberîye bi sîstemê modernîteya demokratîke fikrê xo hetê gerdunî de dekerd mîyanê sîstemêk’ û wina dewam kerde: “Rayberîye bi hawayo hîra sîstemê azadî ya alternatîf ave berde. Seba cinîyan çareserîyêka gerdûnî ave berde. Tevgerê Cinîyan yê Kurd zî na çarçewa de averşîyayîşê xo domneno û têkoşînê cinîyan yê gerdûnî rê rayberî kerd.“


Cinîyan rê zî rayberî kerd

Besê Erzîncane vist vîrî ke Rayberê înan eynî wextî de bi fikir, felsefe û vindetişê xo azadîya cinîyan rê zî rayberî kerdo û wina va:“Şexsê xo de şexsîyeto azad yê camêrdî awan kerdo. Cok ra heme cinîyê ke demokrasî û azadî gêrenî wayîr vejîyenî û no wayîrvejîyayîş zî her ke şono gird beno. Nê semedî ra ma çarçeweya xoverdayîşî de rojbîyayîşê Rayberîya xo pîroz kenî. Ganî cinî û ciwanî vera xo bidî Amara û rojbîyayîşê Rayberîya xo pîroz bikerî. Na çarçewa de ma serra 68. ya Rayberîya xo pîroz kenî û soza girdkerdiş û averberdişê azadîya cinîye danî.”


ANF/BEHDÎNAN