Krîzo ekonomîk heme hetanê Tirkîya ser o tesîrê xo domneno. Heta nika xeylê şîrketanê girdan îflasê xo eşkera kerdo û bi sehezaran esnafan zî cayê karê xo padayo. Tirkîya de 5 serrî û nêmê peyên de nizdîyê 570 hezar esnafan dikanê xo padayo.
Rojnameyê Cumhurîyetî ra goreyê xebera Şehrîban Kiraçe, xeylê esnafî zî meslegê xo bedilnenî. Goreyê doneyanê Konfederasyonê Esnaf û Hunermendanê Tirkîya (TESK) hûmara esnafan emser 6 aşmanê verênan de bîya 1 mîlyon 775 hezar, labelê hûmara cayê karan bîya 1 mîlyon 910 hezar. Krîzo ekonomîk ver 5 serrî û nîme de nizdîyê nêm mîlyon esnafan îflas kerdo û cayê karê xo padayo. Na hûmare goreyê par 433 zêde bîyo.
Cayê karê şenik û normali (KOBÎ) zî mîyanê deynî de yî. Nê cayê karan ra zafê ci yê ke seba ke îflas ra bixelisyî, deyn kerdbi ameyî dûştê qedîyayîşî. Goreyê Dezgehê Rastkerdiş û Taqîbkerdişê Bankawanîye zî eşkera kerd ke verê cû kredîya ke KOBÎyan bikar ardbi 551 mîlyar TL bi labelê emser no pere resayo 629 mîlyar TLyî.
AMED