Herême de operasyonê leşkerî dîyenî dest pêkerdene û wextê operasyonan de adir erzîyeno daristanan û şewat vejîyeno. Netîceyê şewatan de her serre daristanî yenî veşnayene û envaî tewir gandarî yenî çinî kerdene. Herêma Omeryanî ya qezaya Nisêbînî ya Mêrdînî de bi beşdarbîyayîşê xeylê leşker û qoricîyan operasyonê leşkerî dîya dest pêkerdene. Operasyonî ra dima daristanan de şewat vejîya û bi seyan dolimî daristan bi wele. Leşker û qoricîyan mudaxaleyê şewatî nêkerd û şewat heta dewa Musa Antêrî Stîlîlê vila bi. Badê ke şewat resa rez û bexçeyê dewijan, dewijî bi îmkanê xo qismêkê şewatî mirênayî. Dewijan dîyar kerd ke herçiqas ke qedexeyê tebervejîyayîşî ameyo wedarnayene zî, ê mirênayîşê şewatî de zehmetîye ancenî û wina domnayî: “Heta nika bi seyan dar û bexçeyê ma bîyî wele û nînî bikar ardene.” Heto bîn ra mintiqaya Çataksu ke girêdayeyê qezaya Pêrtagî ya Dêrsimî de zî şewat vejîya. Ame musayene ke sebebê şewatî nîno zanayene û şewat nîno qontrol kerdene. Wesayîtê îtfaîye yê şaredarîye kewtî rayîr, labelê şertê erazî ver mudaxale nêameyo kerdene.  MERKEZÊ XEBERAN