Bi nezdîbîyayîşê demê referandûmî ra pîya, operasyonê qirkerdişê sîyasî yê AKP zî bî hera. Vizêr netîceyê operasyonanê dûştê endamanê HDK, TJA, HDP û DBP de cayanê zey Stenbol, Edene, Dîlok, Çewlîg, Dersim, Meletî û Sêrt de bi seyan kesî girotîyay bin çiman.
Stenbol de polêsan eştî keyeyan ser û tewr şênik 70 kesî girotî bin çiman. Jew cayo bîn ke operasyonê qirkerdişê sîyasî virazîyay Dersim bi. Dersim de zî netîceyê sereştişan de Hemseroka DBP ya verî Gulseven Yildiz, rayvebera verî Necla Kiliç girotîyay bin çiman. Qezaya Qisle de zî encumena DBP Selvî Guner girotîya bin çiman.
Çewlîg zî hedef de bi
Çewlîg û qezayanê ci de zî vizêr saetanê şodir de operasyonê hemwext virazîyay. Netîceyê sereştiş û geyrayişê keyeyan de Endamê MP yê DBP Adnan Sari, encumenê Şaredarîya Çewligî DBP yê verî Cihak Yildirim, Endamê Meclîsa Pêroyî yê Sûk Aydin Kara, Îlhan Çakabay ê DBP’yî, Hemserokê DBP’ê yê verî Niyazî Azak, namzeta parlamenterî yê HDP Hîlal Çakabay, Ozkan Kiliç, Orhan Kemal Erboga, Edîp Kaynar û Selîm Baluken ra pîya 14 kesî girotîyay bin çiman. Qezaya Çewlîg Bongîlan de Metîn Çelîk, qezaya Kanîreş de zî kesê bi nameyê Muhammed Hamdîoglu, Ceblîs Karabag, Halît Karabag amey binçim girewten.
Herzewbîn Meletî de 7, Sêrt de 4, Dîlok û qezayanê ci de bi desan kes, Edene de mîyan de endamanê HDP ra pîya xêlê kes girotîyay bin çiman.
NAVENDÊ XEBERAN