Hemserekîya Konseyê Caardişî yê KCKyî derheqê çalakîyanê demê peyênan de mesajêko nuştekî daye. KCKyî va ‘Ma Fermandarîya Eyaletê Serhedî û Fermandarîya Warê Pawitişê Medya ke nê çalakîyan bê vînîbîyaye viraştî, pîroz kenî’ û wina domna: “Ê se bikerî wa bikerî, kamcîn teknîk xebetnenî wa bixebetnî, nêşênî vera gerîlayanê ma yê fedaîyan de serbikewî.” Artêşa tirkî 5ê Nîsane de vera herêma Bradostî ya Başûrê Kurdistanî de hêriş daya destpêkerdiş û hêriş û dagîrkerîya artêşa tirkî aye roje ra nata dewam kenî. Gerîlayê Kurdistanî heta nika vera hêriş û dagîrkerîya artêşa tirkî de xeylê çalakîyê tesîrinî viraştî û derbê girdî dayî artêşa tirkî ro. Reyna gerîlayanê Kurdistanî sere de herêma Serhedî de û xeylê cayanê Vakurê Kurdistanî de zî derbê girdî dayî artêşa tirkî ro. Hemserekîya Konseyê Caardişî yê KCKyî babete ser o mesajêko nuştekî daye û dîyar kerde ke hêzê gerîla xeylê cayan de derbê girdî dayî artêşa tirkî ro. KCKyî mesajê xo de bale anto çalakîyê ke demê peyênan de ameyî viraştiş ser û wina vato: “Ê se bikerî wa bikerî, kamcîn teknîk xebetnenî wa bixebetnî, nêşênî vera gerîlayanê ma yê fedaîyan de serbikewî.” KCKyî mesajê xo de qala çalakîyanê gerîlayan û netîceyê înan de melumatê muhîmî dayo û wina vato: “Fedaîyê Rayber Apo û şarê ma wisar ra heta nika bi seyan leşkerê faşîstî merdî. Tena mîyanê hewteyêk de Agirî, herêma Bradostî û xeylê cayanê bînan de 70 ra zafêr leşkerê artêşa dagîrkere merdî. Ewro dişmen seba ke hewl dano herêma Bradostî dagîr bikero, yeno poşmankerdiş. Gerîlayanê ma tewir bi tewir taktîkan reyde cewab dayî hêrişanê artêşa tirkî. Nê çalakîyê girdî bê vînîbîyaye ameyî kerdiş û na zî pisporîya gerîla nîşan dana. Ma Fermandarîya Eyaletê Serhedî û Fermandarîya Warê Pawitişê Medya ke nê çalakîyan bê vînîbîyaye viraştî, pîroz kenî. Şima herêma Bradostî de wina kerdo ke îradeya leşkeranê tirkî nêmenda şer bikerî.” Ti şansê artêşa tirkî çin o KCKyî mesajê xo de vato ‘warê Lêlîkan û Xakurkê de leşkerê ke sax mendî, tepîya ameyî antiş û herinda înan de leşkerê neweyî ardî’ û wina domna: “No zî nîşan dano ke dişmen vera gerîla de kewto çi halî. Çalakîyanê Lêlîkan û Xakurkê de yewna rey ameyo dîyayîş ke hêzê artêşa tirkî çin o ke bejayî ra şer bikero. Artêşa tirk se kena, wa bikero, kamcîn teknîk bi kar ana wa bîyaro, şansê ci yê serkewtişî çin o. Faşîzmê AKP û MHPyî heme îmkananê xo seba şerî erzena dewre û hewl dana îqtîdarê xo payan ser o bigîra. Labelê bi xoverdayîşê şima û şarê ma do peynîya hêrişkarîya faşîzmî bîyaro. Faşîzmê AKP û MHPyî leşkeran benî merg û do rojêk hesab bidî şaranê Tirkîya û merdimîye.” Hêrişî do tesilî bêrî şiknayîş KCKyî peynîya mesajê xo de wina vato: “Ma fermandar û şerwananê leşkerî yê Xakurkê ke ê waran leşkeranê artêşa tirkî rê kerdî teng, ser nameyê şarê xo pîroz kenî û dewamê serkewtişanê înan wazenî. Polîtîkaya herişkarî ke hetê AKPyî ra vera şar û gerîlayanê ma de yena domnayîş, tesilî do rojêk bêra şiknayîş. Tena şarê kurd û yê Tirkîya nê, şarê Rojhelatê Mîyanênî zî do nê hêzê faşîstî ke dişmenê demokrasî yî ra rizgar bibî.” ANF/BEHDÎNAN