Sey ke yeno zanayîş 16 nîsane de şar do şêro sindoqan ser û heqê xo yo demokratîk bixebetno. Nika ra seba propagandaya referandûmî 2 hetî zî dest bi kampanyaya xo kerdî. Babete ser o Serekê DÎSKî yo kehen û Parlementerê CHPyî yo kehen û Endamê Grûba Dîyalogî Suleyman Çelebîyî qisey kerd.
Ameyî nuqtaya qedîyayîşî
Çelebîyî qiseykerdişê xo de va ‘eke şima persê ‘Tirkîya de problemo yewin çî yo?’ bikerî ez do vaja problemo yewin huqûq o’ û wina dewam kerd: “Tirkîya de huqûq, edalet, azadî û heqê bingeyî ameyî nuqtaya qedîyayîşî. Kesê ke wayîrê vînayîşê cîya-cîyayan î, sey ‘terorîst’ yenê îlankerdiş. Mîyanê nê şertan de şîyayîşê referandûmî do çiqas baş bibo?”
Çelebîyî bale ant kesê ke koç kerdî ser û qiseykerdişê xo wina qedêna: “600 hezar keyeyî cayê ke tede şer estbî ra koç kerdî. Referandûm de do tesîrê koçberan bibo. Şarê ke koçî cayanê cîya-cîyayan bîyî do nêeşkî rayê xo bixebetnî. Heqê weçînayîşî destê şarî ra ameyo giretiş. Seba weçînayîşê ke biedalet, ganî sere de na rewşe bêro başkerdiş. Ez wazena wa na babete baş bêro famkerdiş ke êdî proses bi şîddet nîno çareserkerdiş. Ganî wextê dîyalogî newe ra bêro destpêkerdiş.”
MÊRDÎN