Bi serran o Rayverê Şarê Kurd Abdullah Ocalan şert û mercanê tecrîdêko giran de yeno tepiştiş. Amedijan no tecrîdî rê nêrazîbîyayîş damûsnay û aşkere kerdî ke tecrîd sûcê mordemîyo. Welatijan herzewbîn aşkere kerdî ke tenya Ocalan êşkeno welate çalî ra xelas bikero.
Rayverê Şarê Kurd Abdullah Ocalan 15ê Sibat 1999î ra na het Girawa Îmrali de, hucreyêko yewkesî de yeno tepiştiş. Tewr peynî birayê ci Mehmet Ocalanî 11'ê Îlona 2016’î de pêra pêdîyayîş viraşt. A roj ra na het Ocalanî ra xeber nîna girewtiş. Hikûmeta AKP pozîsyon û rewşa Ocalanî zey şantaj û tehdîdî vera Hereketê Serbestîye Kurd û şarê Kurd de xebetnena. Amedijan tecrîdî rê hêrs û reaksîyonê xo damûsnay û waştî ke desince peynîya tecrîdî bîro dayen.
‘Endîşeyê ma estê’
Esnafê Amedij Mûzaffer Ataciyî ard ziwan ke bi sebebê girankerdişê tecrîdî, derheqê weşîya Ocalanî de endîşeyê (qesawet/qaxû) înan zî benê vêşî. Ataciyî persa ‘Seba çi pêdîyayîşê bi Ocalanî ra yenê manîkerdiş’ pers kerd û aşkere kerd ke bi serran bin şert û mercanê tecrîdî de tepiştişê yew kesê ko seba haştî têkoşîn keno nîna qebulkerdiş.
Mûzaffer Ataciyî vist vîrî ke bi tecrîdî ra pîya lejo ke Tirkîya de esto xorî beno û wina va: “Wazenê Rayverî şarî ra dûr bifînê û pêrokîn qezencanê şarî çinî bikerê. No tecrît şexsê Rayverîyê ma de vera pêrokîn Kurdan ferz beno. Ganî Tirkîya aqilê xo bigîro ser xo. Tenya kesek esto ke Tirkîya na çalî ra bixelesno, o zî Birêz Ocalan o.”
Tecrîd teberê aqilî yo
Welatijan ra Mûsa Aslanî zî tecrîd zey teberê însanîyetî hesibna û vist vîrî ke Ocalan, yew Rayero ke êşkeno seba pêrokîn şaranê dinya ciwîyayîşeke newî biafirno. Aslanî vist vîrî ke teberê aqilîyo ke yew însano ke bi sebebê waştena haştî û têdûştî bîro tecrîdkerdiş.
Qewexanedar Mehmet Barişî da zanayîş ke wazenê bi tecrîdkerdişê Rayverê Kurdan, Kurdan bêveng bikerê û bidê tersnayîş. Barişî vist vîrî ke na polîtîkaya dewlete newî nîya û dewrê Şêx Seîd ra na het yena ramiten û wina va: “Seba ma Rayver sebebê bîyayîşê Kurdan o. Zey şarî ma pey Rayverê xo de yê. Çîyo ke AKP keno pêverardişê şaran o.
Ocalan seba Tirkîya firsendêko
Fîkret Elpe zî, ard ziwan ke Ocalan seba Tirkîya firsendêko û yeno waşten ke bi tecrîdî no firsend zî bîro fedakerdiş. Elpe vist vîrî ke bi tecrîdî wazenê îradeyê şarî tecrîd bikerê û va, se kenê wa bikerê, nêşkenê îradeyê şarî teslîm bigîrê.
Welatijê bi nameyê Velî Ûzûnî zî aşkere kerd ke bi tecrîdî wazenê çimanê şarê Kurd bitersînê û wina va: “Ma dê ti wext nê kerdenanê dûştê mordemî qebul nêkerê. Seba pêrokîn dinya şermêko gird o ke yew însanêko zey fîlozofî girotxane de bîro tepiştiş. Birêz Ocalan sebebê estbîyayîşê şarê Kurd o.”
Tewr peynî de zî Mecît Tûrgayî ard ziwan ke heta ke Ocalan qisey bikero, to tim haştî, omid û aramî bibo. Tûrgayî da zanayîş ke bi tecrîda ser Ocalanî ra însanî mirenê û vatişanê xo wina qedêna: “Bi tecrîdî wazenê şarî bêveng bikerê. Kotîyê dinya de kerdenê winayî esto. No çî ne bi felsefe, ne bi însanîyetî, ne zî bi dînî yeno îfadekerdiş. No tenya faşîzm o."
DÎHABER/AMED