Festîvala Kultur û Tebîetî ya Muzirî ya 19. ya ke emser bi şîarê ‘Dêrsimî rê, bawerî, ziwan û kulturê xo rê wayîr vejîye, biciwîye û bide ciwînayene!’ yena viraştene, vizêr dest pêkerde û do heta 28ê Temmuze dewam bikero.
Festîvale bi panelê ekolojîyî dewam kerde. Panelo ke kuçeyê Sanatî de ame viraştene de seba vîrardişê Nûpelda û Ayazî ke çend rojî verê netîceyê teqayîşê mayînî de merdî, rêz ame girewtene. Panel de muhîmîya kultur û tebîetî de ame qiseykerdene û ame vatene ke seba ke cografyaya Dêrsimî dewlemend o, bi projeyan wazenê ke ma nêçar bikerê.
Serekê Pêroyî yê Federasyonê Komeleyan Alî Haydar Benî zî va ‘festîvale 2 serrî yo ke ameyêne qedexekerdene’ û wina domna: “Herçiqas ke festîvale ameye qedexekerdene zî, ma hertim çarçewaya programê festîvale de erdanê xo ser o gêrayî û ma qedexe nêşinasna. Ma vera polîtîkayanê bêmerdim verdayîşê Dêrsimî de vanî ‘Biagêre erde xo, ma Muzir de tasêk awe bişimî’. Festîvale bi nê vatişan dest pêkerde.”
Kulturê ma yeno qetilkerdene
Çarçeweya festîvale de Meydanê Seyîd Rizayî de eşkerayîyêk ameye dayene. Pîr Zeynel Keteyo ke eşkerayîye de qisey kerd, bale ante zextanê serê Elewîyan û wina va: “Ewro îtîqat û kulturê Elewîyan çin hesibîyenê. Goreyê îtîqatê ma her çî ganî goreyê waştişî bibo. La ewro bê waştişê ma zîyaranê ma ser o projeyan virazenê. Kulturê ma yeno qetilkerdene. Bê destûrê ma çew nêeşkeno çîyêk bikero. Destanê xo dîyaranê ma ser ra biancenê.”
Qiseykerdişan ra dima Koroyê Domanan yê Behzat Fîrikî, Mîkaîl Aslan, Erdogan Emîr, Babetna û Grûbe Vardîya vejîyayî sehne û deyîrî vatî.
DÊRSIM