Girotxaneyanê Tirkîye de Grevê Veyşanî yê tepişteyanê sîyasî ramenê. Verfeka Înisîyatîfê Poştdayîşê Zindanan yê Îzmîrî Selma Altan, vist vîrî ke cayo ke waştenê tepişteyan bîrê qebûlkerdiş de, zextî vêşêr bî û vengê ‘Verîya ke girotxaneyî nêaçaryê keyeyanê merdişî, ganî her kes bikewo hereket’ kerd. HDP zî aşkere kerd ke Grevê Veyşanî şêmigê krîtîk de yê û vengê wayîrvejyayîşî da.
Grev, seba wedarnayîşê tecrîda ser Rayverê Şarê Kurd Abdullah Ocalan’î û peynîardişê binlingkerdişê heqanê girotxaneyan, 15ê Sibate ra tepya destpa kerd. Girotxaneyê Şakranî de Grevê Veyşanî roja 50. de yo. Roja verî gardîyanan wextê pêdîyayîşî de hêrîşê tepişteyan û malbatan kerdî. Malbatê ke weşîya domananê xo ra bi gûmanîyê, veng day raya pêroyîn ke bikewê hereket.
Herzewbîn girotxaneyanê Manîsa, Kiriklar, Menenem, Bandirma, Salîhlî û Kepsût de zî nûmayîş rameno. Tepişteyan rê cezayê hucre, qedexeyê rojname, kovar û kitabî, qedexeyê pêdîyayîş ûsb. yenê dayen. Goreyê zonayîşê ke malbatan day, tepişteyan zaf kîlo kerdo vinî û nêşkenê ser payan de vinderê. La heto bîn ra moralê tepişteyan ca de yo û nûmayîşê xo de bi israr ê.
Şertê tecrîdî ferz benê
Girotxaneyê Manîsa de tepişteyan 15ê Adar ra tepya destbi nûmayişî Grevê Veyşanî kerd û nûmayîş roja 22. de rameno. Na girotxane de tepişteyan re zextê ke asta îşkence de yê, amey ferzkerdiş. Her şew cendirmeyan eştî qoxişan ser, dest nay çîyanê tepişteyan ser. Yê ke hemverê nayî de vejyay zî amey derpkerdiş. Tepişteyan aşkere kerdî ke heta ke nê kerdenê îşkence biqedîye dê nûmayîşê xo biramnê.
Grevê Veyşanî yê girotxaneyê Kiriklar F1, F2 de roja 22. de yo. Goreyê zonayîşan îdareyê girotxaneyî zextê xo kerdî vêşî. Her şew gardîyanî erzenê qoxişan ser û zextê psîkolojîk ramenê.
Tepişteyan tedawî nîkenê
Girotxaneyê Menemen Tîpê T de Grevê Veyşanî kewt roja 22. Malbatê ke derheqê nûmayişî de zonayîşan day vistî vîrî ke rewşê tepişteyê ke girotxaneyê Tîpê R yê Menemenî de yê giran o. Herzewbîn tedawîyê tepişteyanê nêweş nîna kerdiş. Rixmo ke tepiştey nêşkenê hewcedarîyanê xo tenya bi sereyê xo bîyarê ca zî nînê qebûlkerdiş.
Tepişteyê ke girotxaneyê Burhanîye û Bandirma de 22 rojîyo girevî de yê sewqê girotxaneyanê cîya bî. Wextê sewqî de geyrayîşê viranî kerdî, tepişteyê ke hemverê nayî de vejyay zî amey derpkerdiş. Herzewbîn girotxaneyê Salîhlî Kepsut ke grev roja 22. de yeno ramiten de zî tepiştey amey sewqkerdiş.
‘Bikewê hereket’
Verfeka Înisîyatîfê Poştdayîşê Zindanan yê Îzmîrî Selma Altan, vist vîrî ke, jû serra peynî de girotxaneyan de kerdişê ke rûmetê însanî kenê binlingan vêşêr bî. Altan aşkere kerd ke sifte Girotxaneyê Şakran û pêrokîn girotxaneyan de muameleyê kêfî yenê ferzkerdiş û tepişteyan rê tecrîdî mîyan de tecrîd yeno ferzkerdiş. Selma Altan veng da Komîsyonê Heqê Însanan yê Meclîsî û raya pêroyî ya demokratîk ke, verîya ke girotxaneyî nêaçaryê keyeyanê merdişî, ganî ca de her kes bikewo hereket.
HDP: Şêmigê krîtîk o
Desteyê Rayverîn yê HDP zî bi îzahatekê nuşteyîn hayr ant Grevê Veyşanî ser. HDP vist vîrî ke bêhiqûqî û binlingkerdişê heqan yê girotxaneyan resyay merhaleyê da tewr berzêr û wina va: “Zey ke yeno zanayîş xêlê girotxaneyan de Grevê Veyşanî estê. Tayê ci resyayê roja 50. No zî yeno maneya vinîbîyayîşê canî. HDP aşkere kerd ke Grevê Veyşanî şêmigê krîtîk de yê û vengê wayîrvejyayîşî da.
NAVENDÊ XEBERAN