Ma vat zonê ma, sima vat ‘qart qurt.’
Ma vat têdustîye, sima ma famnêkerdîme û vat ‘koledarîye.’
Ma vat hevalîye, sima ma famnêkerdîme.
Ma vat xoserîya xo wazeme, sima ma famnêkerdîme.
Ma vat, haqanê xo wazeme, sima ma famnêkerdîme.
Ma vat serbestîye, sima vat bindestîye.
Ma vat welatê ma, sima vat ‘herkes tirk o, her ca tirkîya.’
Ma lawikê xo vatî, sima ma eştîme hepis.
Ma zonê xo de nusna, sima kitavê ma vêsnayî.
Ma vat zaf kulturîye, sima vat ‘tek...tek....tek....’
Ma vat haştîye’ sima vat ‘herb.’
Sima her tim ma famnêkerdîme. Peynîye de vatena sima bîye, ma kî kewtîme herb verva sima koledaran.
Ma çond dolimî vat bêrê nî çeku bisiknîme berjîme, sima vat ‘dewlete her tim çeku ana kar, sima bêrê teslîm bê.’
Ma seweta haştîye vilê xo naro, sima da maro.
Nika vame xoserîya demokratîk, sima onca ma famnêkenê.
Hometa Tirkîya tarîx de qeyta ma famnêkerdîme. Nika vana ‘na xoserîya demokratîk çik a ma famnêkeme.’
Roştberê xo rojnamevanê xo leto jede nîya fikrînê. Vanê ‘na xoserîya demokratîk kot ra vejîye, ma famnêkeme.’
Ma ke kamij rindîye kerde, hometa Tirkîya ma famnêkerdîme.
Hem ma kiştîme, hem mara vat ‘sima gune ma fambikerê, hassasîyetê ma esto.’ Na neqîye endî nêna ontene. Ma tertele kenê, keşîra pize nêvejîna. Eke hetê înan ra pirnika jûyîra gonî amê, herd û asmên nanê pêra.
Her cayê Tirkîya de însanê ma lînç kenê, kisenê.
‘Demokrat’ nustox, rojnamevan û sîyasetvanê tirk leto jede vanê ‘halk galeyana geldî, halkın hassasiyeti var...’ Hassasîyetê qetilkaran teyna Tirkîya de esto.
Nêvanê na nijadperestîya, faşîzmo, gonewerîya. Jû lawike ebi name ‘hassasîyet’ musê, aye vanê.
Ez miren tewa nêbeno, pirnika tora ke gonî amê, ti dezena heya!!!!
Ma qey yê to cano yê mi boldircano ero!
Kamo ke Tirkîya de vano ‘Kurdan hata nika marê derdê xo, wastena xo araze nêkerdê, ez coka famnêken’ o zur keno.
Se ke nêvat, ma nusna sima kitavê ma vêsnayî, ma vat haştîye sima vat ‘ez to muxatab nêcen, ti kama.’
Ma vat serbest û têdust xorê pîya biciwîme, sima vat ‘sima kole yê bindestî yê sene serbestîye û têdustîye.’
Ma vat ma Tirk nîme, sıma vat ‘sima xalîs mulîst tirk yê.
Ero biko raştîye de sima nêwast û nêwazena ma fambikerê.
Jart jurt meke!