Dewleta tirkî, yanî Anqara her tim û her ca de verva kurdan destebera xo ke çi yeno, kena. Hefto peyen kurdan seweta zonê mayan de perverde wendegehê tirkî boykot kerdî. Gorê serranê verênan, emser tewrbiyayene berz biye. Lewê boykot de binê rayveriya KURDÎ-DER û TZP-KURDÎ de hîrê cayan de wendegehê kurdî ameyî rakerdene. Tabî jê her demî dewleta tirk ya faşîste nî wendegehan rê texamul nêkerd.

Hukumatê AKP bi pêro quweta xo şî domonanê kurdan ser. Nêverda domonî zonê maya xo de perverde bivînê. Biyarîme xo vîrî, îdarekaranê hepisxananê AKP tecavuzê domonanê kurdan rê çimê xo guretî. Hukumatê AKP kî tecavuzkarî nê, mexdurî surginê hepisxananê bînan kerdî, niya ceza dê mexduran. Hora serokkomarê nikayenî û serokwezîrê kanî Recep Tayyîp Erdoganî 2006 de vat bî: “Domonî, qicî, cenî û kokimî, kam beno bibo, quwetê ma yê tîvariye karê xo kenê.” Ora na het kî na fermanê Recep Tayyîp Erdogan yeno ca.
Yardimkarê serokwezîrê tirkî, nijadperest Bulent Arinç ferman da û polîsê AKP hefto peyen verva domonanê kurdî fîştî dewre. Rasîst Bulent Arinç hora reye vat bî: “Zonê kurdî zonê medeniyetî niyo...” Polîsê AKP fermanê Bulent Arinç ra tepiya hen ke est domonanê kurdî ser û da piro, ti vana verva ci kamij dismen esto. Polîsanê AKP rîwalê boykotî ra domonanê marê ejat kerd. Demokrasiya dewleta AKP na wa. Nahletî şero na demokrasî. Quwetanê AKP wendegehê kurdî more kerdî, la kurdan est xover, wendegehê xo onca kerdî ra. Onca bî eskera ke, haştiya ke hukumatê AKP kurdan rê rewa vîneno, zulm o.
AKP onca mesela Rojava de kena eskera ke, kurdan de haştiye seweta aye vatîsode tipûtal o. AKP niyada ke kurdê bakurî wastîsanê xo anê ca, desinde DAÎŞ fîşt dewre. Rêxistina îslamî ya terorîste DAÎŞ 15ê asma îlone ra na het erzena Kobanê ser. Tam 15ê îlone kî kurdan Bakur de dest kerd boykotê wendegehanê tirkî. Dewleta AKP hata nika na rêxistina DAÎŞ  jê rêxistina terorîste name nêkerda. Teyna kurdî nê, endî pêro dîna zonena ke dewleta tirkî na rêxsitine rê yardim kena. Serranê 1990 de eskeranê tirkî sarê gerîlla cira kerdenê, nika azayê DAÎŞ her ca de sarê însanan cira kenê. Îta de kî beno zelal ke tîmên taybetî yê dewleta tirkî azayanê DAÎŞ perverde kenê.
Terorê dewleta tirkî yê verva wendegehanê kurdî reyna misna ma ke, tirkî nêwazenê bi mara piya û têdust biciwiyê. Ebi zor nêbeno, şarê tirkî têdustiye qebul nêkeno, birayenî nêwazeno. O waxt marê ke xatir wastene manena. Belka nika nêşîkîme herdê xo bixelesnîme, la îmkanê ma yê bînî estê: Eke dewleta tirkî texamulê zonanê ma nêkena, ma kî gune endî zonê tirkî, çapemeniye, wenden û nusnayena xora vejîme. Belka o waxt dewleta tirkî ma famkena.