Kurdistanijan zey her roşanî, emserr zî bi ziyaretê mezelanê domananê xo dest bi roşanî kerd. Ziyaretê mezelanê şehîdan de sozê ca-ardişê wastenê înan ame ziwan.
Aşma rojî qedîya û roşanê şekirî destpa kerd. Alemê îslamî badê aşma rojî, roşanî mubarek keno. Kurdistanijan zey her serr, emserr zî, bi ziyaretê mezelanê qeçanê xo dest bi roşanî kerd. Ê cayan ra jew ca zî, qezayê Amed Licê bi. Welatijî şî ziyaretê mezelanê Şehîd Amed û Şehîd Hêvîdar ê dewa Sîsê. Dewleta tirk 21ê Hezîranî de êrişê nê mezelanê şehîdan kerdbi û texrîb kerdbi. Welatijan hêrsê xo ard ziwan û vat ke, iyê mezelanê qeçanê xo newe ra virazê.
Mezeleyan ser de dûayî wanîyay
Cayanê bînan ê Kurdistanî de jî ziyaretê mezelan estbi.Silopî de saetanê şodir de, welatijî kewtî raya mezelan ser. Welatijan mezelan sero dûayî wendî.
Cizîr û Gever de zî welatijî şi ziyaretê mezelanê şehîdan. Amed de zî parlementer, hemşaredar û rayverê HDP, DBP û xeylê saziyan şî ziyaretê mezelanê şehîdan. Nê zîyaretan ra jew zî mezeleyê Vedat Aydin bi.
Tekoşîna Aydinî ramena
Serokê sûk yê Partîya Emegî û Şaran Vedat Aydin o ke 5ê Tîrmeh 1991î de hetê JÎTEM ser qebrê xo de yad bi. Hemseroka DBP Sebahat Tûncel ra pîya, parlementerê HDP, hemşaredarê Amed ra pîya xêlê welatijî tewrê merasîma yadkerden bî. Tûncel merasîm de qisey kerd û da zonayene ke Vedat Aydin pawitoxê şarê xo bi. Tûncel da zonayene ke serr qetilkerdişê Aydinî ra 25 serrî vêrdî ra la ala ey yê tekoşînê qe nêgina war. Hemseroka DBP Sebahat Tûncel vist vîrî ke tekoşîna Aydinî ewro Sûr de, Nisêbîn de, Cizîr, Şirnex û Gever de ramena.
Colemerg, Wan, Agirî, Mêrdîn, Bedlîs, Mûş û cayanê bînan ê Kurdistanî de jî welatijî şî ziyaretê mezelanê şehîdan. Ziyaretan de dûayî wanîyay û sozê ca-ardişê wastenê şehîdan ame ziwan.
Wayrê dawa kurdan bivejime
Civaka Îslamiya Kurdistan ke mesajê roşanê remezanî weşîna dûştê wehşeta verra kurdan veng da hometa misilmanan û aşkere kerd ke poştdayi kurdan wezîfeyekê misilmantî yo.
CÎK bi damûstayînê nuşteyî roşanê remezanî bimbarek kerd. CÎK hayr ant têdûştû, birabîyen û aşma remezanî ser û wina va: “Pêxemberê ma tekoşînê sifteyîn dûştê cehaletî de da. Hewl da ke damûsno ke ebe zonayiş û îrfanî dûştê kolonyalîzmî, nêheqî û zilmî de çima û senî bîro xoverdayen.” Civaka Îslamiya Kurdistan vist vîrî ke quran dûştê zalim, zorba, talanker, dizdox û kiştoxan de, seba peynîardişê nêrindîyan vahîy bîyo.
’Serva menfeatê xo şixulnenê’
Civaka Îslamiya Kurdistan vist vîrî ke Kurdistan de şar bi serrano bin zext û şîdetî de ciwîyeno û hayr ant zilmê AKP ser: “Zilmo ke Newrût û Fîravûnan çaxê xo de misilmanan ra nêkerdî nika dewletê ke nameyê ci misilmanîyê şarê ma ra ferz kenê. Nê îxtidarî bi ters, xîle û zextî dînê îslam goreyê menfeatanê xo şixulnenê. Hikûmeta nikayî yê Tirkîye cinawiranê hov rişena Rojawa, şaran qetil kena, malê ci zî talan kena. Cenîyan remnenê û serreyê ci birnenê. Nê cinawirî talan, tecawuz û qirkerdişî rê fetwa vejnenê. Kesê ke xo rê vanê misilman kurdan danê ver guleyan, bi şûran kişenê.
Ferman û ferzê Homa yo
Civaka Îslamiya Kurdistan hayr ant êrişanê hikûmeta AKP yê dûştê Bakûrê Kurdistan ser û wina va: “Senî ke Rojawa de kurdî bin qirkerden û talanî de xoverdanê se, Bakûrê Kurdistan de zî vêşîyê neyî esto. Mezelxaneyî, camî, sûkî, dewî yenê rijnayen, însanî ganî bi ganî yenê veşnayene.”
CÎKî vist vîrî ke ganî dinya wehşeto ke dûştê kurdan de beno pêheso û damûstayîna xo bi nê vengdayişî qedîna: “Dawaya heqdar yê kurdan him însanî ya, him zî îslamî ya. Şarê kurd û misilmanê pêrokîn dinya ganî kurdan rê yardimê madî û manevî bikerê. No ferman û ferzê Homa yo. Sereva ronayişê edaletî wezîfeyê eslî yê misilmanan o.
ANF/NAVENDÊ XEBERAN