Peynîya erdlerzî xebatê xelisnayişî domyenê, merkezê Xarpêtî de şar teber de nêçare binê serdî de cuyeno. Şarê Xarpêtî dîyar kerd ke şaredarîya Xarpêtî bînayê bi xesar rê zî raporo zexm dana
Tirkîya de seba ke damarê erdlerzî yê fayî bi zaf ê no ser her tim telukeya erdlerzî esta. Dewleta Tirkîye hetanê nika binê nameyê baca erdlerzî de 36 mîlyar dolar pere kom kerda la belê erdlerzê Xarpêtî de nîşan da ke nê pereyê hewna cayê bîn rê ameyî xerckerdiş. Demê erdlerzî Serekê Kizilayî heme welatijan ra pere waşt û no zî bî semedê bertekî.
Xarpêt de 24 çileyî de erdlerzo ke bi 6.8î de virazîya. Hetanî nika Xarpêt û Meletî de 31 kesî cuya dayê û 1556 kesî zî birîndar ê. Peynîya erdlerzî taxê Xarpêtî de Mustafapaşa û Sursuru de 6 bîna rijyayê û apartmanê Aykentî de zî 7 cenaze ame vetînê.
Apartmanê Kalayî de zî xebatê xelisnayişî domyenê. Hetanê nika 18 kesî ame xelisnayiş û 2.5 serra Yusra Yildiz û maya a peynîya 29 saetê ameyê xelisnayiş la pîyê a cuya xo da.
Welatijê teber de vindenê
Nika Xarpêt de hewa zaf bi serd o û welatijê nêçare teber de dormeraya bînayê xo yê bi xesar de vindenê û no zî do bibo semedê qezayan. Zaf welatijî zî nêçare koçê sewbî bajaran kerdê. Ame vatiş ke apartmanê Aykentî ra demo vîyarte de raporo bi xesar ameyo dayiş, no ser welatijî serpiro şaredarî kerdê, şaredarî zî aparmanî ra rapor bi xesar daya. Welatijî tersî ra nêeşkenî şîrî keyeyanê xo rê.
Gezîn de apartmano 6 qetî de xebatê gêrayişî vindertê. Çi balkêşo ke Gezîn de heme keyeyê di qetî la tena no apartman 6 qetî yo. No zî îxmalêko gird nîşan dano. Xûx de heme keye û cayê karî xesar dîyê. Hewna tewro gird o mîzgeftê qezayî zîrar dîyo la dormeraya mîzgeftî vergirewtişê nêameyê girewtiş.
Çadirî ronîyayî la battaniye qiym nêkenê.
Heme welatijanî ke bajar de nêeşkenê keyeyanê xo rê şîrê, înan ra çadirê AFADî ronîyayê û mitfaxê mobîlî awan bîyê. Parka Kulturî de zî kêmanîya çadir û battanîyeyî yenî cuyayiş û na rewşe ra zî welatijî bertek nîşan danê. Seba ke çadirê zaf bi dûrî ra yenî ronayiş, şîyîş û ameyiş zehmet o, no ser welatijê kuçeyan de bi veşnayişê adiran xo germ kenê.
Raporê erdlerzî û mesajê Yewîyeya Netewan
Hetê Fakulteya Endezyarî ya Unîversîteya Stenbolî rê raporo yewin o erdlerzî ame aşkerakerdiş. Goreyê raporî bi hesabkerdişê moment tensorî no erdlerz karakterê Fayê Anatolîaya Rojhelatî nîşan dano. Vervatoxê Yewîyeya Netewan Stephane Dujarrîc zî erdlerz ser o vat ke ê vera cuyayişê erdlerzî de zaf bi xemgîn ê û kesî ke cuya xo dayê, malbatanê înan rê serweşîye wazenê.
MERKEZÊ XEBERAN