Bingê AKP zuran ra muniyo. Verecoy zonê bînan de heqa qursan dê. Bi na game xêle wext qezenc kerd. Çike na heqe dê, hama xêle manê burokratîk zî vetî ver. Qursî şertan ra giredayî. Peyniye de tewa nêbî. Qurs-mursî nêameyî dayene.

Dima unîverstan de kirşiye zonê zazakî û kurmancî nayî ro. Vat “nî unîversîtan de seweta nî zonan maliman rasneme ra.”
Na mavên de mesela dersanê weçînîtayî este werte. Gorê vatene, hata nika 24 hezar û 373 wendekaran dersê zonanê kurmancî û zazakî çînîtê we. Hama seweta nî dersan malimî çîne bî. Bi taybetiye unîversîta Artuklu lawatiye ke, maliman raresno. Peyniye de verecoy unîversîta Mêrdîn Artuklu û taye unîversîtanê bînan 900 malimî rasneyî ra.
Dewlet û hukumatê AKP wad kerd bî, ke nî maliman tayîn bikerê. Nika no wadê AKP zî zur vejiya. Malimanê ke seweta kurmancî û zazakî dîplom guret, nika werte de mendê. Hukumatê AKP tayînê nî maliman nêkeno. Tabî, raştiye de AKP zî  jê MHP û CHP verva zonê mayan de perverde vejîna. MHP û CHP qe ke nê eskera vanê “ma nêwazeme”, hama AKP zur kena. Ha sima rê kemalîzm û faşîmo kewe!
Hata nika hukumatê zurekerî yê AKP waxtê xo bi qurs û dersanê weçînîtayî xelesna ard na roze. Paketa xo yê “demokratîk kerdene” de zî zonê mayan de perverde berd teslîmê Fetullah Gulenî kerd. Bi na qerar “Paketa demokratîk kerdena” AKP zî zur vejiye.
Suc ma dero. Hatake ma zonê tirkî sazî û dezgeyanê xora, çê xora nêvet, Recep Tayyîp Erdogan zî niya pê ma kaykeno.
        ***Sond***
Domonê ma endî mecburî niyê her roz seweta tirkperestiye sond borê. Na qefçiliye werte ra dariye we.
Hama partiya Huseyîn Aygun CHP ra 2 mordemî estê, nika şa giredanê. Hurdemena bervenê danê xoro, vanê ‘no andimiz ça dariya we’ porê xo ruçiknenê. Xizir hondena derdan ci do, dewlemendê dezan kero.
Nînan ra jû rayverê partiya Huseyîn Aygun, Kemal Kiliçdaroglu yo, jû zî hevalê Huseyîn Aygun, Kamer Genç o. MHPyîzan ra jede CHPyîzî tirkperestiye kenê.
Kemal Kiliçdaroglu jê MHPyîzanê serranê 70 fikrîno.
Yê Kamer Genç hora mezgê xo awe gureta. Eke tirkiyode rind qeseybikero, mordem derd nêweno. Waxtoke derheqê “andimiz”de meclîse de tirkî qesey kerd, astê tirkî zonda. Ancax jû mordemoke honde xiravin tirkî qeseykeno, verva wedardayena “andimiz” vejîno.
CHP hem verva zonê payan de perverde, hem zî verva wedardayena “andimiz” vejîna.
No hal Huseyîn Aygun û hevalê xoyê ke 2011 de seweta weçnîtîs şî Dersîm û poşt dê partiya qetilkare, CHP, înan rê xêr bo.