Kurd û Tirkî birayê yewbînan ê û hezar serra ke tal û tenge de pilosîyê yewbînan ra, welatê xo dişmenî ra şeveknayo.“
Heya, ma na vatene ewro her roj sed dolime pêsera-pêsera heşnenîme. Yanê vanê ke ma şima zulmê Şêx Seîdî ra şeveknayî. Ma şima Qoçgîrî de Alîşêr û Zarîfe ra xelesnayî ra…. Ma şima kurdî Dêrsim de eşkeftan ra vetî û kerdî merdim û Seyîd Riza yo ke sebebê cahîlîya şima bî ma darde kerd. Ma Agirî de, Zîlan de kurdê xayînî şima mîyan ra weçinîtî û biratîya xo kerde zexm.
1960 ra bigê heta 1970-80 , şew û roj xort û azebê kurdanê ke waşto mabenê ma de fasadîye bikerê ma kîştî û bingeyê biratîya xo hîna kerde hewl. 1980 de ma zindanê Dîyarbekirî de kurdê xayînî kerdî parçe û pirtilî û eştî kutikan ver ke wa her kes hêza dewlete bivîno. Ma ziwanê kurdan kerd qedexe û îlim û îrfan musna kurdan. Ma dewê şima veşnayî û şima kerdî bajarij. Ma Roboskî de nameyê şima yo ke vecîyaybî qaçaxçîtîye kerd pak. Ma şima lîyaqê nameyê Tirkî dîyî. Ê naye ra hêca çi esto. Heya, ma ra wina vanê…
Se serrîyo ke hişê dewlete de tewr çîyê nêvurîyayo. Bi qirkerdişî û çine hesibnayîşî kurdan de nîyado, kerdo ke merdene ra biratîye, zorbazîye ra haştîye bimûno. La ewro ginaya xendeqanê kurdan ra û bi ters û xof, kena ke ci ra bivecîyo. Nê xendeqan ra vecîyayene hendê rehet nîya êdî. Xendeqî têna Sur de, Silopî de, Cizîre de nêameyê kinitenê, mejîye, hîsîyatê her kurdî de xendeqî ameyê kinitenê û êdî îdeolojîyo fermî nêeşkeno game bierzo. Her Kurdî keyeyê xo kerdo meterîsê xoverdayîşî. Na roje ra dime mûmkîna binkewtişê Kurdan çîn a. Rojhilat ra bigê heta Rojava, Başûr ra bigê heta Bakûr,her Kurd her parçeyê Kurdîstanî de seba ciwîyayena newîye,seba dinyaya newîye tarix û pergalê serdestan ver xoverdano.
Dewlete bi tanq û topan, pêroyê Kurdîstanî de, tarîxê xo yê zordar û zalimî rijnena de û boya qefçile fîna serê rîyê erdî. Na boya cengê gemarinî her hetê dinyaye ra êna hîs kerdêne êdî. Her çî eşkerayo û kes nêeşkeno çiman ver bidarno we.
Zulm û înkarkerdişê sedserrê se ke heta ewro Tirkîya rê çîyê fayde nêkerdo,ewro ra dime zî ci rê faydeyê xo nêbeno. Ewro ra dime bikero bikero bi polîtîkayanê îmha û înkarkerdişî Dewleta AKP ye mezela xo dana kinitêne.