Birgül Ayman Güler bi vatîsê xo yê peyenî nijadperestiya CHP reyna kerde zelal. Berxûdar bo, wesûwar bo!

Ma zoneme, na partiye Tertelê Dersîmî virast. Hata ewro CHP na tertele mudafa kena. Serokê na partiye jûyo dersîmiz o, hama tam biyo dimoçikê dewleta terorîste. Hem zî ebi xo biyo nijadperest. Kemal Kiliçdaroglu vano “zonê mayan de perverde welat keno letey”. Tirkî sevekneno, zonanê bînan nêwazeno, MHP ra biyo beter. Yanî mordemek vano “ez tirk, Tirkiye welatê mi, tirkî zonê mi, tirkperestiye îdeolojiyê min ê”. No mêrik eskera vano, o kam o û çiko.
Jû qese esto vanê “Îmam ke fise kerde, cemaat nêzon çi keno”. Îmam Kemal ke zonê dayîk û bavikê xo qebul nêkerd, Birgül Ayman Güler zî niya vana.
Ma, Kemal Kılıçdaroğlu û Kamer Genç sero qeseynêkerîme. Cayê înan zelal o, eskera xo înkar kenê. Domonê Atatürk yê. Ey zî kokê Dersîm ardo, qomê Dersîm qirkerdo. Nika îta de ma gune Hüseyîn Aygün sero qeseybikerîme. Ey zî reye vat bî “ben iyi bir CHP’liyim”. Mirê hen yeno ke Hüseyîn Aygün raya Kamer Genç ra sono. Seweta kariyera xo her kar keno.
Seke Kamer Genç her ca de vejîno, destê herkesî paçkeno, Hüseyîn Aygün zî hen yo. Hetê ra Seyîd Rizayî jê rayverê qomê Dersîm qebul nêkeno, heto bîn ra peyser dayena îtîbarê Seyîd Rizayî wazeno. Hona ke mebus nêbîbî, jû televîzyon de vat bî “qomê Dersîm rayverenî qebul nêkeno, ma de vanê herkes axayê xo yo”. No yeno çi mane? Manê xo qebul nêkerdena rolê Seyîd Rizayî yo.
Niyadê!
Kemal Kılıçdaroğlu vano “zonê mayan de perverde nêbeno, welat beno letey” Hüseyîn Aygün ra vengê nêvejîno. Ebi xo zî zazakî qesey keno û nusneno. Hama verva vatîsanê nijadpesret yê Kemal Kiliçdaroglu tewa nêvano.
Birgül Ayman Güler vana “netevê tirk û miletê kurd têdust nêbenê” Huseyîn Aygun vengê xo nêvezeno. Belka zî caye çiye vato, hama mi ne hesna, ne zî wend. Mebusê Semsur, Salih Fırat CHP ra îstîfa keno, Huseyîn Aygun hona lewê domonanê Atatürk, Kamer Genç û Kemal Kılıçdaroğlu dero.
Kam çi zono, Hüseyün Aygün belka zî vano “Birgül Ayman Güler kurdan ra vato, mara nêvato, ma zaza îme”.  Hama a cenîka CHPyize na qese înasanê ke tirk niyê, înan ra vato, kurd, zaza û iye bînî.