Serekîya Dayîreyê Polîtîkayanê Cinîyan, Serekîya Dayîreyê Xurtkerdişê Ekonomîya Herêmî yê Şaredarîya Bajarê Girdî yê Amedî pîya semedo ke vernîya koçê mewsimî bigîrê kişta Çemê Dîcleyî de 300 donum Bostanê Bajarî awan kerd û bostanî ra hînî mehsulê peyênî yenê arêdayîş. Proje bi sloganê “Ma Qayîlê Cayo ke Tede ameyê Dinya de Bibê Mird” dest pêkerd û ci ra 40 Keyeyê Sûrijî feyde vînayî. Keyeyan demê hamnanî de bostan ra firingî, îsot, balîcan, fasulya, bamya, xîyar, zebeş, qawun û susamî arêdayî û Peyas, Rezan û Yenîşehîr de mîyanê bazaranê semtan de rotî. Hemwelatî na proje ver zaf razî yê û qayîlê wa serrêna zî na proje dewam bikero.
Zebzeyî bazaran de ameyî rotiş
Mudira Şaxa Xurtkerdişê Ekonomîya Cinîyan ya Serekîya Dayîreyê Polîtîkayanê Cinîyan Fatma Esmere, îzah kerd ke bi Projeya “Ma Qayîlê Cayo ke Tede ameyê Dinya de Bibê Mird” desteg dîyayo 40 Keyeyanê Sûrijan û wina va “Bostanê Bajarî de hînî mehsulê peyênî yenê arêdayîş. Keyeyanê ke bostanî ramit zebzeyê xo mîyanê hewteyî 7 roj rot. Zebzeyî Peyas de 2, Rezan de 2 pêroyî de 4 bazaran de ameyî rotiş. Semedê rotişê zebzeyan vernîya Şaredarîya Bajarê Girdî de her hewte roja çarşeme stant ame ronayîş. Heto bîn ra keyeyan, lazimtîya xo ya zebzeyan zî tîya ra ard ca.”
‘Karê ma weş o û ma tira razî yê’
Fatma Ocala ke Bostanê Bajarî ra esmer îstîfade kerd vana ke, Ma esmer tîya de bostan na ro û zebzeyanê xo benê bazaran de roşenê. Karê ma baş vêreno. Ma karê xo ra razî yê. Ma xebitîyenê û heqê nanê xo vejenê. Eke ez keye de bîyêne nê çî zî nêbîyêne. Ma hem heqê nanê xo vejenê hem zî xebitîyenê. Verê cû ez keye de bîya û mi çîyêk qezenc nêkerdêne. Şikir homayî rê ma tîya de debara xo kenê. Ma qayîlê wa her serre na xebate biba û dewam bikera.
Hemwelatî Hasan Ocal zî wina vano “ Ma bi destanê xo resnenê, roşenê û wenê. Ma esmer zebzeyê xo bazaran de bi destanê xo rot. Ge-ge siparîş kerdêne û ma bi no qayde zî rotêne. La ez wina vajî, destegê şaredarî muhîm o û baş o. Seba ma, na xebate zaf baş a. Teber de xebiştîyayîş ra başêr a. Qezencê ma baş o. Eke merdim cad nêkero nêşkeno qezenc bikero. Eke her serre bostan bidê ma baş beno. Eke wina bo ma zî debara xo welatê xo de kenê. Heta ke ma şinê teberê welatî de karkerî kenê, ma erdê xo ser o xebitîyenê.”
AMED