Meclîsê Cenîyan yê Şaredarîya Dersim sereva dîyardayişê emegê cenîyan verîya 3 aşman projeyê bostanî vist pratîkî. Bostano ke 15 dolim hêgayan de ame kariten de paleyê sifte amey arekerden. Bostan bi tovanê organîk ke dew û qezayan ra amey arekerden resîya û dermanê zîraî nêamey şixulnayen. Serva ke mêş û morî, kêzikî zerar nêdê şitila, hurendîya dermanan dûmanê tepikan şixulnîya. Cenîyê ke sewzeyê zey samik, îsot, balcan, kundir û xîyar resnay berhemanê xo yê sifteyîn bi heyecanekê gird are kerdî. Hemşaredara Dersim Nûrhayat Altûn derheqê proje de qisey kerd û behsê heyecanê arekerdenê berhemahê ewilî kerd.
‘Eke cenî hedef bikerê…’
Nûrhayat Altûn vist vîrî ke bado ke berhemê sifteyîn amey arekerden, erjê emegî hona jêde ame fehmkerden û aşkere kerd ke hedefê xo yê sifteyîn ardî ca. Altûn da zonayen ke wextê verîn yê destpakerdisê projeyî de tayî çormeyan vatî “Sima besenîkenê” û nîya dewam kerd: “Eke cenî biwazo çîyo ke besenîkero çîno. Şert û mercî çiqe zehmetbê kî tenîya wa cenî hedef bikerê, serva resnayenê no hedefî wa emeg û hewldayen bidî. No projeyê ma kî tam mînakê nayî yo, raştîyekê cenîyan o. Nayî ra ma heyecanekê gird ciwîyenê. Herzewbîn ma rûmetê ca ardişê sozo ke ma da însanan ciwîyenê. Nayî ra bostan serva ma heskerdiş û girêdayişê jû mayê yê domanê xo yo. Verîya çend rozan varoneke. Cenîyê ke no bostanî rê emeg day pêrokînan bi şew persa ‘Eceb bostanî rê teva bi’ kerdî. Her kesî eynî hîs ciwîya.”
‘Komuna wertex’
Midûra Polîtîkayanê Cenîyan yê Şaredarîya Dersim Ayten Kordu zî da zonayen ke rojanê verên wexto ke bostanî de gureyay rîwalê germî û eforo ke day ezdîyay, la peycoy dî ke bi kêfweşî û şabîyena gureyînê kolektîf, pîyaezdîyayen zehmetî yenê ravêrnayen.
Kordû da zonayen ke emeg û poşdayişeke qijkek muhîm bi û nîya dewam kerd: “Xo ra bostan de ma waşt çîyekê bikerê. Bi emegî ra îya komunekê wertex. Na ca de emeg dayis û hemverê no emegî de berhem girewtiş bi. Ma berhemanê sifte de şabîyen û heyecanê viraştişê nayî ciwîyenê.” Kordu da zonayen ke emserr serva înan sifte bi û va: “Kêmîyê ma estê. Ma hewl danê ke nayî açarnê kultur û şiklê ciwîyayişî. Gunê ma nayî ravey berê û vila bikerê. Ge ge zerîdarê ma kî yenê. La gunê na homar hona jêde berz bibo. Ma wazeme ke nê cayê wertex jêde bibê. Ma berhemê xo yê sifte vilayê kesê kal û pîr, astengdar û kesê ke hewcedarîyê ci estê kerdî.
DÎHA/DERSIM