Qiseykerdişê “boya pîse yena,” qiseykerdişê Erdoganî yo. Wexto ke Amerîka derheqê wezîrê Erdoganî yo kehen Zafer Caglayanî de qerarê tepiştişî girewte, Erdoganî hina va.
Erdogan raşt qisey keno. Boya pîse yena. La na boya pîse boya karê xirabî yê Erdoganî ya. Erdoganî Kurdistan herimnayo, Rojhelato Mîyanênî herimnayo, dinya herimnayo. Erdogan tena Kurdistan û dinya nêherimnayo. Erdogan dînê Îslamî herimnayo. Erdogan însanîyet herimnayo. Erdogan pê herimwerî û kiştoxîyê xo pêronê dinya herimnaya. Nika boya herimnayîş û kiştoxîyê eyê vejîyayê werti. Erdoganî vatêne qey ‘ez bê hayîyê Amerîka û dinya, torêk awan kena û tewirêko nimite Îran reyde bazirganî kena, dinya pênêhesîyana’.
Erdoganî se kerd nêeşka binimno. Kurdistan û heme dinya pêhesîyayî. Derheqê wezîrê Erdoganî Egemen Bagiş, Muammer Guler, Zafer Caglayan û Mudire Halkbankî Suleyman Aslanî de mehkeme abîye. La Erdoganî mudaxele kerd û nêverda wezîrê eyê bikewî hepisxane. Tena bazirgano sextekar Riza Zerrab û Mudirê Halkbankî Suleyman Aslan ameyê tepiştiş, li ser mudaxeleyê Erdoganî dima ra serbest ameyê veradayîş. Çunke înan pê fermanê Erdoganî, torêk awankerdbî û dewleta Îranî reyde bazirganî kerdêne. Amerîka na rewşe rê çimê xo nêgirewte. Riza Zerrab wexto ke şi Amerîka uca de ame tepiştiş. Hetkarê Mudurê Halkbankî Mehmet Hakan Atîlla zî senî şi Amerîka, uca de ame tepiştiş. Amerîka nika zî derheqê Zafer Caglayan û Suleyman Aslanî de qerarê tepiştişî girewte, Erdogan ser nayî vano ‘boya pîse yena’. Erdogan kewto tersê tepişîyayîşî. Herkes û Amerîka weş zanî ke heme çîyî pê fermanê Erdoganî benî. Do Erdogan ra hesab bêro perskerdiş. Erdogan hina tersa ke cade Trumpî rê telefon akerd û va ‘ez 16 û 17ê Êlule de yena Amerîka’. Telefon reyde qiseykerdişê xo zî vila kerd. Hina kerd ke cirm, suc û gumanê ke ser ey de estî, vila bikero. Erdogan se bikero, nêeşkeno cirm û sucê xo binimiino.
Çunke Erdogan tena hetê bazîrganî de nê, hetê kiştoxî de cirm û sucî kerdî. Erdoganî DAIŞ, El Nusra înan weye kerdî. Perwerde kerdî û şirawitî Rojawanê Kurdistanî û heme cayanê dinya. Komkiştişan rê wayîrî kerd. Vakur û Başûrê Kurdistanî de cirm û sucê girdî kerdî. Wezîfedarê Erdoganî do yewe bi yewe bêrî tepiştiş la Erdogan xilas bibo. Çîyêko winasî mumkin nîyo. Erdogan qirkerdiş bikero û ey rê bimano? Erdogan sextekarî bikero do ey rê bimano? Erdogan dizdî bikero do ey rê bimano?
Bena tayî bawer bikerê. La peynîya peynî Erdogan do bêro mehkemekerdiş û bêro tepiştiş û bikewo hepisxane. Çunke cirm û sucê Erdoganî yê Hîtlerî ra vîyartî.