Artêşa Tirkan 27ê Gulane de vera Başûrê Kurdîstanî de operasyonêko leşkerî da destpêkerdene û operasyon hîn zî dewam keno. Çarçewaya operasyonî de hêrişê hewayî qet nêvindetî û ge-ge pêrodayîşê şîddetinî qewimîyenî. Goreyê çimeyanê herêmî erazî, hêga, bexçe û rezê dewijan dîyayî adirî ver û xeylê heywanê dewijan ameyî kiştene.
Reyna zîyaro ke aydê alimanê Îslamî ra yew o û nizdîyê Hêzimê Kanîreş û Kevirvêtê de yo, ameyo veşnayene. Teyarayanê şerî yê artêşa Tirkan vizêr serê sibayî hêrişê dewan kerd. Teyarayan hêrişê dewa Mêrgereşî yê Bradostî kerd û netîceyê hêrişan de herême de şewat vejîya.
Hêzê pêşmergeyan şi herême û wexto ke pêşmergeyî herême de bî, teyarayan reyna hêriş kerd. Netîceyê hêrişî de 1ê ci giran 4 pêşmergeyî birîndar bîyî. Reyna ame musayene ke pêşmergeyêkê linga xo vînî kerda. Ame dîyar kerdene ke pêşmergeyê ke birîndar bîyî, Hêzê Pêşmergeyan yê 80. ke girêdayeyê PDKyî yo de wezîfe kenî. Heto bîn ra çimeyê herêmî dîyar kenî ke nê operasyonî de vînîbîyayeyê leşkeran zî xeylê zaf î.
MA / AMED