Îdarekaranê KJKyî ra Koçerîn Amede derheqê xoverdayîşê herêma Xakurkê û Bradostî de va ‘na coğrafya tarîx ra nata çi rey fek ercanê xo ra veranêdayo’ û wina dewam kerde: “Hemraye Bêrîtane zî na coğrafya de çalakîya xo ya fedaî kerdbî. Ma zî qerardar ê ke vera hêriş û dagîrkerîye de xeta Bêrîtane temsîl bikerê.”

Demêko derg o ke artêşa Tirkî vera Başûrê Kurdîstanî de bin nameyê Operasyonê Pençe de hêrişê dagîrkerîye keno û hewl dano Başûr de dagîrkerîye bikera. Heta nika vera artêşa Tirkî de xoverdayîşêko tarîxî ame nîşandayene û no het de operasyonê artêşa Tirkî veng ameyî vetene.

Babete ser o Îdarekaranê KJKyî ra Koçerîn Amede derheqê xoverdayîşê herêma Xakurkê û Bradostî de qisey kerde û qala xoverdayîşê gerîlayan kerde. Amede va ‘herêma Xakurkê ke mabênê hîrêgoşeyê Îran, Îraq, Tirkîya de yo hetê jeopolîtîkî ra wayîrê muhîmîyêka stratejîke yo’ û wina domnaye: “Herêma Xakurkê heman wextî de sey herêma Bradostî yena zanayene. Hem hetê tarîxî ra û hem zî hetê dewrê nikayênî ra cografyayêka xeylî muhîm a.”

Amede bale ante xoverdayoxîya na herême ser û wina va: “Na cografya çi rey ercanê xo yê kulturkîyan ra nêvisîyaya. Her tim kokê xo ser o zergûn bîya û bi nê hewayî estena xo pawita. Tarîx de na herême de tim şerî qewimîyayî û herême bîya wareyê xoverdayîşî. Timî bîya hedefê hêrişanê hêzanê şaristanîye û bi organîzasyonanê eşîrkîyan û konfederasyonî xo vera hêrişan de pawito. Seba metodê xopawitişî yê Kurdan nimûneyêko xopawitişî yo. Herêma Bradostî sey hempeymanêka xopawitişî ya. Na yewe çende bica bêro do cimat û şar xo hende bipawo, ercanê xo yê kulturkîyan bipawo.”

Herêma Bradostî seba têkoşînê azadîye zaf muhîm a

Amede dîyar kerde ke herêma Xakurkê seba tarîxê înan ê têkoşînî zî xeylî muhîm a û wina va: “Na herêmanê sereke û bingeyênan ra yew a ke têkoşînê ma yê azadîye tede dest pêkerd. Rayberîye bi welatperwerîya xurte ya na herême zanabi, loma têkoşînê na herême muhîm dî. Herêma ke embaz Egîd tede mend û munaqeşeyê destpêkî yê plansazîya Hemleya 15ê Tebaxe ameye kerdene ya. Wareyo ke pratîkê gerîla yê destpêkî tede ameyî kerdene yo. Na herêma ke ma gama destpêkî ya gerîlatîye eşte, seba tarîxê têkoşînê ma xeylî muhîm a.”

Bi serkêşîya Bêrîtane xeta xoverdayîşî ser kewte

Amede bale ante çalakîya fedaîye ya Bêrîtane (Gulnaz Karataş) ke serra 1992î de Xakurkê de viraştbî ser û wina vat: “Hemraye Bêrîtane bi hawayêk ke ro tarîxê herêma Bradostî yê xoverdayîşê PKKyî yeno, şexsîyetê xo de xoverdayîşî aver berd û vera hêrişanê îşxalî yê TCyî û hemkarîye de, bi hawayêkê bêemanî heta guleyê peyênî şer kerde, têkoşîn da. Bi mesuldarîyêka pîle xover da, seba ke esîr nêkewo dest, çalakîya fedaîye kerde. Derbeyêka pîle daye dagîrkerî û xîyanetî ro. Herêma Xakurkê de xîyanet raste ra ame wedartene û bi serkêşîya Bêrîtane de xeta xoverdayîşî bi ser kewte.”

‘Ma qerardarê ke xeta Bêrîtane temsîl bikerê’

Amede qala dagîrkerîya nê demî ya herêma Xakurkê kerde û wina qedênaye. “Şarê ma yê Başûrê Kurdistanî vera na dagîrkerîye de yo. Herêma Bradostî ê herêman ra yew a ke Kurdan estena xo ûca ra girewto. Pawitişê herêma Bradostî pawitişê estena xo yo. Seba naye zî lazimîya ma esta ke ma hîna zaf organîze bibê û çalakîyan virazê. Ma qerardar ê ke vera hêriş û dagîrkerîye de xeta Bêrîtane temsîl bikerê.”

AMED