Vera tayînkerdişê qayûm û xespkerdişê şaredarîyan de reaksîyonî dewam kenî. Bajarê Amedî de roja ke şaredarîyî ameyî xespkerdene ra nata yo ke şar çalakîye de yo. Roja 10. de cinî, camêrd, doman û ciwanî zî tede bi seyan kesî beşdarê çalakîye bîyî. Çalakîye de cinîyan deyîrê xoverdayîşî vatî.
19ê Tebaxe de şaredarîyê bajarê girdî yê Amed, Wan û Mêrdînî hetê îqtîdarê AKPyî ra ameyî xespkerdene û herinda hemserekê şaredarîyan de qayûmî ameyî tayînkerdene. Seke yeno zanayene qayûmî reya dîyine ya ke yenî tayînkerdene û vera tayînkerdişê qayûman de reaksîyonî dewam kenî.
Roja ke qayûmî tayîn bîyî ra nata sere de Amed, Wan, Mêrdîn û xeylê cayanê bînan de çalakîyî dewam kenî. Bitaybetî xeylê welatanê Ewropa de çalakîyê protestokerdişî dewam kenî. Îqtîdarê AKPyî seba ke vernîya çalakîyan bigîro, xeylê bajaran de çalakîyî qedexe kerdî.
Heta nika Şirnex, Wan û sewbîna cayan de Walîyan çalakî û sewbîna aktîvîteyî qedexe kerdî. Hetê qedexeyan de çalakîyê xoverdayîşî zî dewam kenî. Cayê ke çalakîyî bêmabên dewam kenî ra yew zî Amed o. Vernîya Şaredarîya Bajarê Girdî ya Amedî de çalakîya protestoyî heta nika bêmabên dewam kerda. Çalakîya Amedî roja 10. de zî bi beşdarbîyayîşêko gird dest pêkerde.
Çalakgêrî girîyayî binê abluqa
Çalakgêran sey her roje Cadeyê Lîse yê Yenîşehîrî de ameyî têhet û çalakîya roniştişî daye destpêkerdene. Polîsan bi barîyer û TOMAyan dormeyê çalakgêran girewt û destûr nêda ke wesayît û peyayî ewja ra derbas bîbî. Parlamenteranê HDPyî ra Zeynel Ozen, Hasan Ozguneş, Salîha Aydenîze, Remzîye Tosûne, Nîmetullah Erdogmûş, Hişyar Ozsoy, Dersîm Dage, Feleknas Ûca û Hemserekê Şaredarîya Bajarê Girdî ya Amedî Adnan Selçûk Mizrakli ke herinda ci de qayûm ame tayînkerdene zî tede xeylê sîyasetmedarî beşdarê çalakîye bîyî.
Cinîyan deyîrê xoverdayîşî vatî
Xeylê kesî beşdarê çalakîye bîyî û destek daye çalakîye. Domanê ke beşdarê çalakîye bîyî, dovîzê sey ‘Ma qayûman nêwazenî, ma bajarê ke dostê domanan î wazenî’ akerdî. Reyna ciwanê ke çalakîye de cayê xo girewtî zî, dovîzo ke ser o ‘Ma çira merdî? Pirsûs, Anqara, Amed’ nuşte bi, akerd. Çalakîye bi deyîranê xoverdayîşî destpêkerde. Temsîlkarê xeylê rêxistine û dezgehanê cimatkîyan zî destek da çalakîye.
Operasyonê qayûman veng vejîya
Heto bîn ra badê ke qayûmî ameybî tayînkerdene, bi seyan kesî ameybî tepiştene û tena Amed de nizdîyê 84 kesî tepişîyabî. Nînan ra 40 kesî îfadeyan ra dima serbest amebî veradayene û derheqê 44 kesan de zî qerarê dergkerdişê wextê tepiştişî amebî girewtene. Nînan ra 34 kesî tayê ci emnîyet ra tayê ci zî edlîye ra veradîyayî. Tewr peynî 10 kesê ke mendî zî bi şertê ‘Kontrolo edlî’ serbest ameyî veradayene. Bi veradîyayîşê heme kesan operasyonî zî veng vejîyayî.
AMED