Çalakîyê protestoyî ke vera xespbîyayîşê şaredarîyanê Amed, Wan û Mêrdînî de yenî kerdene, dewam kenî. Çalakîyî roja 19ê Tebaxe ra nata bêmabên dewam kenî. Bitaybetî çalakîya ke Amed de Cadeyê Lîse de yena viraştene her roje bi beşdarbîyayîşê bi seyan kesan dewam kena.
Çalakîya Nobeta Demokrasî ya Amedî roja 20. de ya. Parlamenterê HDPyî, îdarekarê Partîya Sosyalîste ya Bindestan, Meclîsê Dayîkanê Aştîye, endamê MEBYA-DERî û bi seyan kesî beşdarê çalakîye bîyî. Dormeyê çalakgêran de abluqaya polîsan dewam kena.
Çalakgêran bi cinitişê fîtik û çepikan xespbîyayîşê şaredarîyan û tayînbîyayîşê qayûman şermezar kerd. Cayo ke çalakîye yena viraştene de kursîyêk ameyo ronayene û tîya de çalakgêrî fikrê xo anî ziwan. Heta nika xeylê partî, komele, temsîlkaranê sendîkayan, nuştox, roşnvîr û akademîsyenî beşdarê çalakîye bîyî.
AMED