Rayberê Şarê Kurdî Abdullah Ocalanî bi mabênkarîya avûkatanê xo mektûbêk erşawito. Ocalanî mektûba xo de veng dayo çalakwananê grevê vêşanîye û rojeyê mergî û wina vato: “Şima resayî amancê xo. Ez hêvî kena ke şima çalakîya xo biqedênî.”
Avûkatanê Rayberê Şarê Kurdî Abdullah Ocalanî Rezan Sarica û Nevroz Ûysale 22ê Gulane de muwekkîlê xo reyde pêvînayîşêk kerdbi. Avûkatanê Buroyê Huqûqî yê Asrinî vizêr derheqê pêvînayîşî de melumat da çapemenîye û mesajê Ocalanî pare kerd.
Avûkatan ra Nevroz Ûysale, Rezan Sarica, Îbrahîm Bîlmez û Razîye Turgute beşdarê eşkeradayîşî bîyî. Avûkatan ra Îbrahîm Bîlmezî derheqê pêvînayîşî de dîyar kerd ke rojeva pêvînayîşî grevê vêşanîye û rojeyê mergî bî.
Dima ra Nevroz Ûysale metno ke amebi amadekerdene, wend. Ûysale bale ante pêvînayîşê 22ê Gulane ser û wina va: “Pêvînayîşo ke verê cu amebi kerdene de 7 madeyê deklarasyonî ser o amebi vindetene û munaqeşeyî bîyaye derbaz bîyî. Ocalanî da zanayene ke pêvînayîşo ke verê cu amebi kerdene nîno manaya muzakereyan. Ocalanî qala muhîmîya metno ke verê cu raya pêroyî rê amebî dayene, kerde. Ocalanî da vato ke lazimîya Tirkîya bi munaqeşekerdişê mefhûmanê pêkerdişê komelkî, sîyaseto demokratîk û aştîya rûmetinî esta û da ard ziwan ke no het de çi bikewo, ser milê ey, o do bikero.”
Ûysale va ‘Ocalanî derheqê 7 madeyê ke verê cu ma eşkera kerdbî de fikrê xo dibare kerdî’ û wina domnaye: “Ocalanî dîyar kerd ke eke îmkan bibo, o do çareserîya heme problemanê Sûrîye de rolê xo kay bikero û da zanayene ke fikir û pêşnîyazê ci do probleman çareser bikerî. Ocalanî muhîmîya qanûno bingeyî ser o vindet û nîşan da ke gerek heqê esasî yê kurdan bigîrîyî temînatê qanûnî.”
Ocalan muzakereyan de israr keno
Ûysale va ‘tecrîd problemêko cîddî yo’ û wina dewam kerde: “Wexto ke pêvînayîşî bîyênê, Ocalanî bi hawayo aktîf rolê xo kay kerdêne û no zî tesîrêko bîyaye rewşa welatî ser o kerdêne. Labelê wexto ke tecrîd ame girankerdene, komelan ser o bêhêvîtîye hakim bî. Ma pêvînayîşan de dî ke Ocalan israr keno ke wa problemî bi esasê aştîye de çareser bibî û muzakereyî bêrî esasgirewtene. Pêvînayîş de xeylê babetan ser o ame vindetene. Birêz Ocalanî derheqê çalakwananê grevê vêşanîye û rojeyê mergî de sipasîyanê xo seba fedakarîya çalakwanan kerdî û vindetişê dayîkan zî muhîm dî. Cok ra dayîkan rê silamanê xo yê taybetan erşawitî.”
Birêz Ocalanî mektûbêk erşawito
Ûysale derheqê çalakîyan de fikrê Ocalanî pare kerd û wina va: “Birêz Ocalanî dîyar kerd ke grevê vêşanîye û rojeyê mergî resayî amancê xo û waşt ke wa çalakîye bêrî qedênayene. Ma bawer kenî ke no vengdayîş ra dima çalakîyî biqedyî. Birêz Ocalanî derheqê grevê vêşanîye de nimuneya Gandîyî da û dîyar kerd ke grevê ci bi têkoşînê komelkî bimana bi. Birêz Ocalanî derheqê grevan de mektûbêk erşawito.”
Şima resayî amancê xo
Mesajê Ocalanî wina yo: “Hemrayê erjîyayeyî; embazê ke grevê vêşanîye û rojeyê mergî de yî, ez hêvî kena ke şima eşkerakerdişê 2 avûkatanê mi ra dima, çalakîya xo biqedêne. Şima resayî amancê xo û ez şima hemînan rê heskerdiş û sipasîyanê xo erşawena. Ya muhîm o yo ke şima nika ra pey mi reyde bibî û wina hereket bikerî. Silam û heskerdişê bêpeynîyî. 22ê Gulana 2019, Zîndanê Îmrali. Abdullah OCALAN!”
AMED