Hemvervatoxa Kongreya Demokratîke ya Şaran (HDK) Fatma Kiliçarslane bi wesîleya nizdîbîyayîşê 25ê Kanûne, derheqê şîedetê serê cinîyan û xoverdayîşê cinîyan de qisey kerde û bale ante piştîdayîşê dewlete yê camêrdî ser.
Kiliçarslane dîyar kerde ke ê bi wesîleya 25ê Teşrîna Peyêne Roja Têkoşînê Mîyanneteweyîye ya Vera Şîdetê Serê Cinîyan de ê pîya bi xeylî rêxistine û platformanê cinîyan çalakîyanê hemparî do vîrazî. Kiliçaslane wina domnaye: “Ma nika ra her ca de dest bi amadekarîya çalakîyan kenê. Cinîyî dibistane, kuçe, keye, meclîs û sewbîna xeylê cayan de estê û do her ca de wayîrê heqanê xo bivejîyê. Ma do vera îqtîdar, dewlete û camêrdan de vengê xo berz bikerê.”
Kiliçarslane vist vîrî ke Tirkîya rixmo ke peymana Stenbolî mor kerdo zî qeydeyanê peymana bica nêana û wina va: “Xoverdayîşê cinîyan rixmê heme hêrişan çend şino xurt beno. Cinîyî nika her cayê cuye de qîrênê û vanê ma estê. Zîhnîyeto serdest ê camêrdî naye ra terseno û pêkerdişê Stenbolî ke heqanê cinîyan paweno, qebul nêkeno. Camêrd cinî qetil keno û hukmo nêrî qetilkarî paweno. Heta ke dewlete gamêk nêerza do qetilkerdişê cinîyan dewam bikerê. Ma do heme qetilkerdişê cinîyan teqîp bikerê. Ma do her ca de xoverdayîş xurt bikerê.”
ANF / ANQARA