Hetê MSD ra Eyn Îsa de Komxebata Dîyalogî ya Sûrîye ameye viraştene. Delegeyan ra Xeyas Neyisî Teyarî wina va: “Pêvînayîşê ke erdê Sûrîye mîyan de yenî viraştene, seba çareserîye zaf muhîm î. Pêvînayîşê ke Astana, Soçî û Tehran de ameyî viraştene nê, tîya ra çareserîye vejîyena.”

NAZIM DAŞTAN / MA / EYN ÎSA

Hêzanê mîyanneteweyîyan û welatê herêmî çend reyan Stenbol, Tehran, Astana, Soçî û sewbîna xeylê cayan de bin nameyê çareserîye problemê Sûrîye de kombîyayîşî viraştî, labelê cayêk de zî çareserîyêk nêvejîya. Meclîsê Sûrîyeya Demokratîke (MSD) zî nika tayê komxebatan organîze kena.

Seke yeno zanayene nê komxebatan ra komxebata yewine aşma temmuze de amebî viraştene. Komxebata dîyine zî qezaya Eyn Îsa ke girêdayeyê Kantonê Girê Spî ya de ameye viraştene. Komxebata Dîyalogî ya Sûrîye bi babeta ‘Ma Sûrîye newe ra awan bikerî û aver bîşêrî’ dest pêkerde û 2 rojan dewam kerde.

Komxebate de pêro pîya 6 babetan ser o ame vindetene. Roja sifteyîne de babetê ‘Rewşa merdimîye’, ‘ekonomî’ û ‘awankerdişê sîstemî’ ameyî munaqeşekerdene. Roja dîyine de zî babetê ‘Çareserîye de cayê têkoşînê cinîyan’, ‘Qanûno bingeyî yê Sûrîye’ û ‘Muxalefetê Sûrîye do senî bibo hempar’ ser o ame vindetene. Heme cayanê Sûrîye ra pêro pîya 100 delegeyî beşdarê komxebate bîyî.

Şarî do çareserîye bivînî

Delegeyan ra Xeyas Neyisî Teyar Ewropa ra beşdarê komxebate bi. Teyarî va ‘seba çareserîye ganî roniştişê winasî zêde bibî’ û wina domna: “Ganî ti kes vera rewşa ke esta de bêveng nêmano. Eke rewşêka îstîkrarin biba, o wext xizmeto tewr gird dîyeno şaranê Sûrîye.”

Teyarî dîyar kerd ke modelê çareserîye ke do bivejîyo, ganî xizmetê şarî bikero û wina va: “Herêmê Vakur û Rojhelatî seba Sûrîyeyêka demokratîke wayîrê tecrube yî. Ma eşkenî nêyî ra feyde bivînî. Heto bîn de tayê bajarî binê dagîrkerîya Tirkîya de yî û hewl dîyeno ke na dagîrkerîye hîna hîra bibo. Tayê hêzê herêmî û mîyanneteweyî wazenî xerîteya Sûrîye xêz bikerî. Na babete de Rûsya, Îran, Tirkîya û Amerîka bi hawayo aktîf xebetîyenî. Ma do daxilê nêyî nêbî. Şarî do çareserîya xo bigêrî û bivînî.”

Muxatabê ma nîyî

Teyarî dewamê qiseykerdişê xo de va ‘kombîyayîşo ke 2 aşmî verê amebi viraştene zî zaf muhîm bi’ û wina dewam kerd: “Pêvînayîşê winasî vernîya çareserîye akenî. Na komxebate de heme Sûrîye cayê xo girewtî. Herkes çareserîye ser o qisey kerd û fikrê xo va. Ganî sûrîyeyijî wayîrê çareserîye bivejyî. Ti kes nêşêno ser nameyê înan qeraran bigîro. Pêvînayîşê ke erdê Sûrîye mîyan de yenî viraştene, seba çareserîye zaf muhîm î. Pêvînayîşê ke Astana, Soçî û Tehran de ameyî viraştene de çareserîye nêvejîyena. Astana de ser nameyê Sûrîye ti sûrîyeyij çinêbi. Qerarî hetê dagîrkeran ra yenî girewtene. Ewro komxebata Eyn Îsa cîya ya. Ma şarê xo reyde bi hawayo azade munaqeşe kenî û hewl danî ke ameyoxê Sûrîye dîyar bikerî. Kombîyayîş û pêvînayîşê ke teber de virazîyenî, muxatabê ma nîyî.”