KCKyî serrgêra 12ê êlule ser o îzehetêko nuştekî da û kesê ke şehîd kewtî bi rêzdarî vîr ardî. KCKyî îzehetê xo de vato ‘ewro Tirkîya de lazimî bi vindetiş û xeta têkoşînî ya Mahîr Çayan, Îbrahîm Kaypakkaya û Denîz Gezmîşî esta’ û wina dewam kerdo: “Bitaybetî ganî ma têkoşînê azadîye yê kurdan û têkoşînê demokrasî û azadîye yê kedkar û şaran bikerî yew.”

Hemserekîya Konseyê Caardişî yê KCKyî derheqê serrgêra derbeya leşkerî ya 12ê êlule de îzehetêko nuştekî daye û qala têkoşînê ortaxî kerde.

KCKyî îzehetê xo de vato ‘derbeya 12ê êlule ser ra 38 serrî derbaz bîyî’ û wina dewam kerdo: “Ma derbekaran lanet kenî û yê ke wextê derbe de şehîd kewtî, birîndar bîyî û seqet mendî bi rêzdarî vîr anî. Ma bawer kenî ke têkoşînê xoverdakaran do bibo wesîleya Tirkîyaya Demokratîke, Kurdistano Azad û Rojhelatê Mîyanênî yê Demokratîke.”

KCKyî dewamê îzehetê xo de wina vato: “Faşîzmê 12ê êlule seba çîyê ke vernîya qetlîyamanê ci de benî asteng wedarno, zextê girdî kerdî. Labelê faşîzm netîceyê rojeyê mergî yê 14ê Temmuze binkewt. Xoverdayîşo ke Kemal Pîr û Hayrî Durmuşî rayberîya ci kerdêne, zorê faşîzmê 12ê êlule berd û heme hesabê qetlîyamî ke Kurdistan ser o estbî, veng vet. Eke ewro Tirkîya de têkoşînê şorişgêrî yê demokratîke dewam keno, ma nê deyndarê şorişgêrê ke Zîndanê Amedî de şehîd kewtî yî.”

Lazimî bi têkoşînê ortaxî esta

KCKyî qiseykerdişê xo de bale anto ser têkoşînê ke 1980î ra ver ser û wina va: “Tirkîya de serra 1980î ra ver têkoşînêko cîddî aver şîyo. Nêyî de rolê Mahîr Çayan, Denîz Gezmîş û Îbrahîm Kaypakkayayî dîyarker o. Çimkî nê şorişgêrî babeta problemê kurdî de vindetişêko baş nîşan dayî. Vindetişê înan ciwanan ser o tesîrêko gird viraşt. Labelê şertê faşîzmê 12ê êlule de seba ke tayînan derheqê probleme kurdî de vindetişêko baş nîşan nêda, têkoşînêko xurt aver nêşi. Bitaybetî tayînan seba ke reaksîyonê dewlete nêgirî, bi hawayo oportunîst vindetî. Ganî serrgêra derbeya faşîste de ma nînan ser o zî bivinderî. Çimkî seba îfadekerdişê faşîzmê 12ê êlule, şertê ewro qîm nêkenî.”

Ganî têkoşînêko ortax bêro dayene

KCKyî îzehetê xo de qala têkoşînê ortaxî kerdo û wina vato: “Ewro Tirkîya de lazimî bi vindetiş û xeta têkoşînî ya Mahîr Çayan, Îbrahîm Kaypakkaya û Denîz Gezmîşî esta. Bitaybetî ganî ma têkoşînê azadîye yê kurdan û têkoşînê demokrasî û azadîye yê kedkar û şaran bikerî yew. No zaf muhîm o û eke muhîmîya ci nêro fam kerdene, o wext vera faşîzmê AKP û MHPyî de têkoşînêko tesîrin nîno dayene. Eke têkoşînêko winasî nêro dayene, o wext vernîya dîktatorîya faşîste de ti astengî nêmaneno.”

KCKyî peynîya îzehetê xo de wina vato: “Ma serrgêra faşîzmê 12ê êlule de şorişgêrê ke vera faşîzmî de têkoşîn dayî û şehîd kewtî, bi rêzdarî yad kenî. Ma do xeyalê înan yê azadî, demokrasî û sosyalîzmî berz bikerî û xeyalanê înan Tirkîya, Kurdistan û Rojhelato Mîyanên de pê bîyarî.”

 

ANF / BRUKSEL