Partîya Yewîya Demokratîke (PYD) netîceyê kombîyayîşê xo yê 2. de planê xo yê xebatanê 2 aşman aşkere kerde. PYDyî îzehetê xo de qala dagîrkerîya dewleta tirkî ya Efrînî kerdo û dayo zanayene ke azadîya Efrînî yeno manaya çareserîye. PYDyî seba Kongreya Neteweyîya Kurdan veng dayo herkesi. Partîya Yewîya Demokratîke (PYD) kombîyayîşê xo yê çarin viraşte û planê xo yê xebatanê 2 aşman aşkere kerde. PYDyî îzehetê xo de qala xeylê babetan kerdo. PYDyî îzehetê xo de vato ‘ma emser kombîyayîşê xo yê çarin viraşt’ û wina dewam kerdo: “Kombîyayîş de ma plananê buroyanê Cinîye, Rêxistinbîyayîş, Ciwan, Çapemenîye û sewbîna ser o munaqeşe kerdî. Reyna ma averşîyayîşê herême û dinya ser o zî munaqeşe kerdo. Tewr peynî ma planê xo yê xebatanê 2 aşman viraşt.” Îzehet de bale ancîyayo dagîrkerîya dewleta tirkî ser û wina ameyo vatene: “Kombîyayîş de ame dîyar kerdene ke azadîya Efrînî yewin wezîfeyê kurdanê Sûrîye yo. Azadîya Efrînî yeno manaya çareserîya problemanê Sûrîye. Kombîyayîş de awanbîyayîşê Îdareyê Xoserî yê Sûrîyeya Vakur û Rojhelatî yê MSDyî ameyo silam kerdene. Beşdarvanê kombîyayîşî aştîya dinya pawitî û destekê xo YPG, YPJ û HSDyî rê aşkere kerdî.” Ma destek danî pêvînayîşan Dewamê îzehetî de wina ameyo vatene: “Ma pêvînayîşê MSD û rejîmê Şamî bi hawayo bîyaye vînenî û destek danî ci. Nê pêvînayîşî seba çareserîye muhîm î. Herçiqas ke netîceyo ke yeno waştene nêvejîyeno zî seba Sûrîyeyêka demokratîke baş o. Heto bîn ra kombîyayîş de ame vatene ke Tirkîya wazena çarçewaya Mîsaki Mîllî de estena xo ya Îdlîbî meşrû bikera.” Muhîmîya kongreya neteweyî PYDyî peynîya îzehetê xo de qala muhîmîya Kongreya Neteweyîya Kurdan zî kerdo û wina vato: “Kombîyayîş de çîyê ke vernîya Kongreya Neteweyîya Kurdan de benî asteng ser o ameyo vindetene û seba derbazkerdişê nînan munaqeşeyî ameyî kerdene. Bi na kongre do waştişê heme parçeyanê Kurdîstanî yena ca, cok ra ganî ma seba viraştişê kongre çi destê ma ra bêro, ma do bikerî. Na kongre demokratîkbîyayîşê Rojhelatê Mîyanênîn de zaf muhîm a. Kesê ke beşdarê kombîyayîşî bîyî, dîyar kerdî ke do têkilîya înan bi kesê ke mîyanê komelê Sûrîye de wayîrê cayêko muhîm î reyde dewam bikera. Cok ra kombîyayîş de seba wayîrvejîyayîşê erjê şarî û yewîya neteweyî veng ameyo dayene. ” QAMIŞLO