Zîndananê Kurdîstan û Tirkîya de bi deshezaran hepsîyî estî û nînan ra bi seyan hepsîyî nêweş î. Hepsîyanê nêweşan ra tayê ci nêşênî tena sereyê xo zîndan de bimanî, labelê reyna tedawîya înan nîna kerdene û raporê ‘eşkeno zîndan de bimano’ dîyeno înan.
Endama Komîsyonê Zîndanan ê ÎHDyî Zelal Demîraye da zanayene ke hepsîyê nêweşî tena wextê muracatî de derheqê înan de yan zî xeberanê derheqê mergê înan de yenê roeve û wina va: “Dîyar o ke dewlete bawerîya xo bi nêweşîya nê hepsîyan nêana. Naye ra zafê muracatanê ma red kenê. Dimayê nê redkerdişan zî xeberanê mergê hepsîyan yenê, labelê dewlete xo qet sey berpirsîyara mergan nêvînena.”
Demîraye bale ante Muhsîn Kizilkano ke Zîndanê Osmanîye de wefat kerd ser û wina va: “Ma seba Kizilkayayî zaf reyan muracat kerd, labelê netîce nêbedilîya. Goreyê madeyê 16. yê qanûnê înfazî eke hepsîyêk rîyê nêweşîyêkî ra nêeşko tena bi sereyê xo zîndan de bimano, ganî cezaya ci bêra taloqkerdene. Na babete de nêbeno ke tena dezgehêk qerar bido yan zî tena Dezgehê Tibê Edlî qerar bido. Zîndanê Osmanîye de rewşa hepsî Sabrî Kayayî zî her roje giranêr bena. Reyna 21 hepsîyê bînî yê nêweşî herême de estê. Mîyanê înan de hepsîyê ke dimayê grevê vêşanî nêweş kewtî zî estê. Hepsîyê nêweşî Tirkîya de sey hacetê sîyasîyî yenê bikarardene. Naye ra muracatî yenê redkerdene. Na rewşe çarçeweya heqanê merdiman de nêna qebulkerdene.”
ANF / EDENE