Hata nika mi karê Mikaîl Aslan sero tewa nênusna. No dolimo vireno, ez wazen mosilê (berhemê) Mikaîl ser binusnî.

Albumê Mikaîl bi name “Xoza” hefto peyen ‘Kalan Muzîk’ de vejiya. Xoza yeno manê tabîatî.
Waxtoke mordemî hêga nêramit, orosna ra kerd filan, hêga de weşiye bena têra, her vas xorê na herd de ca vîneno, na hal rê vanê xoza.
Albumê Mikaîl “Xoza” zî niya ro. Gorê mi, her kes besekeno na “Xoza” de xo bîvîno, bihesno.
Jê her timî, album de kilamî leto jede qelema Mikaîl ra vejiyê. “Çem Vano”, “Adirê Zerrê Ma”, ”Hîrê Canî” û jû enstrumental mosilê qelema Mikaîl yê.
Kilama “Çem Vano” ser Mikaîl niya vano: “Yê her çemî jû kilama xo esta. ... Her çem rengê herdê xo kirisneno beno, çiqas ke şî honde beno zelal, eseqiyero derya, wazeno bireso ci, bi sebir raya xora sono,”
Belka zî Mikaîl teyna çemê ma sero na lawike nênusna, hama nimite binê tesîrê hal çemanê ma de mendo.
Kilama “Çem Vano” bi nî qeseyan qedîna: rengê deryayî kewiyo pako/Awa to hona gewra lêla/Çemî va “ez ke kewtu raye, awa mi bena zelal sona”
Çemê ma na roze ra tepiya zelalbiyayena xo pînê.
Heya! Vireniya çemanê ma bi bend û barajan yena guretene. Mikaîl naye kilama “Adirê Zerrê Ma” de ano ra zon.
Kilame niya dest kena ci: “Adirê zerrê ma têv medê/Barsê pêtaga ma qurdî mekerê....../Gola Çetu vana:”Şiya we çila ma/Bixuse çemê ma, vengê to kamî birna......” Na kilame gune rind bêro famkerdene. Ma herdê xo roseme û bi na tore medaxê çemanê xo weme. Ma, taye dersimijî.
“Hewa Gulî Begî” tamode bîn dana album. Jû şuyara, hama bi destê Mikaîl ma bena derya muzîk. Qeseyî yê Sey Qajî yê, çime Saît Baksî yo.
Album de şuyara bîne zî kilama “Hîrê Canî” ya. Hîrê ceniyê şoreşgerî vêsayê Parîs de. Şuyare niya qedîna: “Dayîka kokime mi ver ra selam kerê/Heq na kilame barê sayîrî nêkero/Sarê kirmancî pêro amo bi ser/ destnêkeno wedaro.”
Jû kilama bîne esta ke, zerya mordemî vêsnena. Bi name “Xelas Yew Awka” û hetê rahmetin Şex Mehdî (Özsoy) ra ama nusnayene. Ben sa ke, ma bi na lawike Şex Mehdî naskeme û miyanê ma de maneno. Bi nî qesan: “ez ha belaya bela ho mıno/ez sınî ınî tuzbun gen ken ınî laya/verg kot muın buelun kutık nılawa/ ınî sınî heyat sınî dinyaya.”
Kilamanê bînan zî meraqê sima rê verdan.
Tabî na album de Cemîl Qoçgîrî onca bi xêle kar û bêçikanê xo yê efsunî ca ceno.
Qelema to xirt, vengê to bakî bo Mikaîl!