Dêrsim de pêrodayîşê 2ê Gulane de gerîlayê HPGyî Nevaf Kortak (Baran) şehîd bi. Merdimanê Kortakî ke cenazeya ey Dezgehê Tibê Edlî yê Meletî ra girewte, waşt ke qezaya Bismîlî ya Amedî de camî de wecîbeyanê dînî bîyarê ca la polîsan destûr nêda.
Datê Kortakî Zubeyîr Kortakî da zanayene ke polîsan tira vato “Camî ya dewlete ya, ma çirey destûr nêdanê şima tîya wecîbeyanê dînî ê ey bîyarê ca. Ma destûr nêdanê melayê ke kadro yê, meyîtî reyde eleqedar bibê. Şima bi xo se kene, bikerê. Eke wextê defin de zî vengê yew siloganî bêro ma do cenaze şima rê bigêrê.”
Merdimanê Kortakî wecîbeyê dînî bi xo ardê ca û binê ablûqayê polîsan de cenazeya xo Goristanê Akpinarî de defin kerda. Polîsan destûr nêdayo taziyê zî camî de bêro ronayene. Tazîye keyeyê Kortakî de ameyo ronayene. Zubeyîr Kortakî vera nê zextan de reaksîyon nîşan da û wina va: “Hukmatê AKPyî xo musluman ramojneno û binê nê nameyî de domananê ma qetil keno. Destûrê cenaze nêdanê. Tena xo rê musluman ê, ma rê faşîst ê.”
Mela Ahmet Aydenîzo ke meyîtê Kortakî şito, va ‘na bêhurmetîya vera meyîtî de nêna qebulkerdene’ û wina va: “Camî û cayê tazîye hetê şarê qeza ra ameyî viraştene la destûr nêdîyeno ke wecîbeyê domanê înan tîya de bêrê bicaardene. Her îtîqatî de cenazeyî bi merasîmî yenê wedarnayene. Ê ke nê kene, musluman nîyî.”
MA / AMED