21ê Temmuze de qezaya Rezanî ya Amedî de polîsan eştbî keyeyêk ser de û ewja de bi nameyê Mucahît Yilmazî de ciwanêk amebî qetilkerdene. Cenazeya Yilmazî hetê keyeyê ci ra 47 rojî yo ke ameya teşhîskerdene, labelê cenaze nêdîyena keyeyî.
Herçiqas ke medyaya hetgire vatbî netîceyê pêrodayîşî de merdo zî îfadeyê şahidan û çîyê ke keyeyî de ameyî dîyayene nîşan danî ke Mucahît Yilmaz ameyo înfazkerdene. Cenazeya Yilmazî hedîse ra dima neqlê morgê nêweşxaneyî bîyo û 47 rojî yo ke nêdîyeno. Keyeyê Yilmazî ke muracatê Dozgerîya Amedî kerd, dozgerîye keyeyî ra vato ‘netîceyê analîzê DNA hîna dîyar nêbîyo’ û ‘Dozger destûr de yo’ û sewbîna çîyî yenî vatene.
Dayîke Xecîce Yilmaze vera nînan de reaksîyon nîşan daye û wina va: “Ma 47 rojî yo ke paweyê girewtişê cenaze yî. No zulm ra vîşêr çîyêk nîyo. Heme ca de herinda engîştan esta, labelê seba ke nîno hesabê înan, cenazeya ma nêdanî. Ma cenazeya xo teşhîs kerda û ê zî baş zanî ke lajê ma yo. Ma her roje Mêrdîn ra seba dîyayîşê dozgerî şonî Amed. Wa cenaze demêko raver bidî. Ma sewbîna çîyêk nêwazenî.”
Seba ke cenaze bidîyo kampanya
Heto bîn ra medyaya sosyale ser ro seba ke cenaze bidîyo keyeyê Yilmazî, kampanya dîyaye destpêkerdene. Twîtter ser o bi hastagê #Mucahidincenazesiniverin kampanya dîyaya destpêkerdene û na kampanya rojeva Twîtterî ya Tirkîya de bîya rojeva dîyine. n AMED