Zey Kurdistan, Tirkiye û welatanê Awrûpa, pêrokîn dinya de cenî bi bunasebetê 8ê Adar meydanan de yê. Ceniyê kurd zî bi waştenê xoserî û azadî nûmayişan rê rayverîn kenê.
Londra de cenî rayşî
Paytexta Îngilîstan Londra de zî peyniya hefte di hezar cenî vejyay meydanan û vera her şiklê şîdet vengê xo kerdî berz. Ceniyê ke Oxford Circus de are bî, heta Meydanê Trafalgar ray şî. Xêlê rêxistinê civaka sivîl, komelî û komîsyonanê cenî paşt day nûmayiş. Nûmayiş hetê hereketa ‘Millon women rising’ organîze bi. Rayşiyîn de derheqê şîdetê vera ceniyan de panqartî hewadiyay. Nûmayiş de herzewbîn hayr anciya binlingkerdişê emegê ceniyan ser û vengê jûbiyayiş ame dayen. Nûmayişkaran polîtîkayanê sîstema kapîtalîst yê derheqê cenî û netewan rê nêrazîbiyen damusnay û waştena azadî, têdûstî kerdî. Ceniyê kurd zî bin banê Meclîsê Roj Woman de, bi reng û vengê xo tewrê nûmayiş bî. Ceniyê kurd yê ke kincê (çina) xo yê neteweyî xo day, eleqeyê gird antî. Platformê Paştdayen yê Ceniyan ê Londra zî bi panqarta ke hayr ant qetlîamanê Kurdistan ser, tewrê rayşiyayiş bî.
Heîlbronn de aktivîteyê 8ê Adar
Sûka Almanya Heîlbronn de zî ceniyanê kurd bi wesîleyê 8ê Adar di rojan aktivîte organîze kerdî. Roja Şeme ceniyanê kurd, bi ceniyanê alman ra piya zereyê sûk de stand rona. Stand de panqarta “bi rihê Sara hu Sêvêyan hetê xoserî û azadî” aliqnay. Derheqê tekoşînê ceniyanê kurd de bi seyan vilavokî amey vilakerdin. Herzewbîn derheqê barbarîzmê DAIŞ de ceniyan jew tiyatro damusna.
Roja Yewşeme de zî cenî Navendê Civaka Demokratîk de are bî. Temsîlkara YJK-E Delal Rûbar qisey kerd û 8ê Adar pêrokîn ceniyan rê bimbarek kerd. Rûbar hayr ant tarîxê 8ê Adar ser û da zonayen ke, tekoşîna ke bi Sarayan destpa kerd, herzewbîn tekoşîneke serva kamî ya. Delal Rûbar aşkere kerd ke tekoşînê ceniyanê kurd ke Rayverê Şarê Kurd Abdullah Ocalan’î emegê gird day, nika pêrokîn dinya rê biya îlhamê quwetî. Rûbar vist vîrî ke, ceniyê kurd ke Rojawa de vera DAIŞ xover day, nika zî cayanê xoverdayişê xorayverînan de tekoşînekê gird ramenê. Badê qiseyan, ceniyan bi deyranê hunermendan govend girotî.
Bê komun nêmanime
Hannover de zî Meclîsê Ceniyan yê Ronahî, 3. Kongreyê xo viraşt. Kongre de hayr anciya şîdeta vera ceniyan ser û hewcedariya ronayenê meclîs û komunanê ceniyan ser. Delegeyan aşkere kerdî ke, ganî jû cenî zî bê komun nêmano, bi qûwetê xo yê cewherî xo tenzîm bikero. Kongre de hayr anciya civaka demokratîk ser û hayr anciya mîsyonê ceniyan ser.
Sûka bîn yê Almanya Offenbach de zî Meclîsê Sara yê Ceniyan roniya. Kongre yo ke jew dêr de viraziya 60 cenî tewr bî. Temsîlkara YJK-E Berîtan Nisêbîn kongre de qisey kerd û hayr ant êrişanê dewleta Tirk yê vera cenî û şarê Kurd ser. Nisêbîn da zonayen ke, dewlet ser teşîrkerdenê bedenê ceniyan de herbêda qilêrîn ramena. Temsîlkara Navdem yê Offenbach Vîldan Dîrîk zî qisey kerd û ard ziwan ke ganî xoverdayişê ceniyan ra wayir bîro vejiyayen. Bonn de zî Azayê Meclîsê Sara yê Ceniyan kombiyayişê are de amey têlewe.
Qetlîamî bi xoverdayiş vindenê
Hagen de zî hetê Meclîsê Fîdan yê Ceniyan aktivîteyê 8ê Adar viraziya. Ceniyê ke xoverdayişê xorayverînan de şehît kewtî vîr amey û mesajê berzkerdişê tekoşîn ame dayen. Sûka Meschede de zî panelê 8ê Adar viraziya. Bodensee de şewa 8ê Adar viraziya. Şew de êrişê dewleta tirk yê vera ceniyan û şarê kurd rê nêrazîbiyen damusniya. Komela Alewiyan yê Frîedrîchshafen zî rîwalê 8ê Adar panel viraşt. Panel de vajiya ke qetlîamê dewlet encex bi xoverdayişê piyayî êşkenê vindernê.Paytexta Avûstûrya Vîyana de zî Komela Ceniyanê Kurd Avesta bi wesîleyê 8ê Adar aktivîteyekê viraşt. Kesê ke tewrê organîzasyonî bî xoverdayişê şarê kurd silamî kerdî.
NAVENDÊ XEBERAN