AKP ke weçînayîşê 7’ê hezîranî ra dima nêşkena îktîdarî bigîro destê xo, Tirkîya verba şerî ra beno. Zaf şaristanan de qetilkerdişê sîvîlan ame kerdiş. Babete sero wekîla HDP ya Wanî Tugba Hezer ciresna ke çîyêy ke yenî cuyayîş seyî yew senaryo yo û şar hemverî hukimatî mîyanê bê bawerî de yo. Lazim o têkoşîn bêro girdkerdiş.
Hezer ravêreyeya koalîsyonî nirxna û ard ziwan ke no encamê koalîsyonî semeda înan sey surprîz nîyo û wina domna: “Çimkî gêrayîşek bin bandora qesrî de bi û na semedî ra zî wina bi encam bî. 7’ê hezîranî de sereyî de demokrasî û dima zî şarê Turkîya yew serkewtişek gird dest eşto. Labelê no semeda herkesî baş nêbi. Bi taybetî zî semeda qesr, Erdogan û AKPî qet baş nêbi. Îktîdara AKPî ya 13 serreyî estbi û Erdogan zî semeda ke bibo serek no gêrayîşê koalîsyonî nêame viraştiş. Nêy heme zî mojneno ke nêy gêrayîşê ke ame kerdiş sey senaryo bi.
Şar qerqîzyeno
Hezer dergeyîya qalîkerdişê xo de ard ziwan ke no şer şerê desthilatdarîyo û wina domna: “Ma zî sey HDP bawer kenîy ke weçînayîşê ke verwext bivirazyo do vengê HDPî qat bi qat vêşî bibo. Yeno ma vîr ke wextê xebatê weçînayîşan de HDP zaf provokasyonan vîyarna. Hîna nêy provokasyonî nêameybî roşnkerdiş Qetlîama Pirsûsî virazya. Cayo ke hetê huqiqî de şar sere piro dano bê encam maneno. Nika hemverê hukimatî şarî de yew ters û bê bawerîyek girde awan bîyo. Her roj ma yew cenazeyî reyde rî bi rî manenî. Her tim ma yew mayî reyde eleqeder benî ke wa tayna rehetêr bibo û boya xo bido. No şar mecbur nîyo ke nînan bicuyo.”
Polîtîkayêy leymin
Hezer peynîya qalîkerdişê xo de dîyar kerd ke persgirêkêy cenî û ciwanan Tirkîya de mîyanê persirêkanê tewr muhîman de yo û wina domna: “Ravêreyeya ke yena cuyayîş nêy persgirêkan hîna averêr bena. Cenî û ciwanî tarîtî ra yenî kaşkerdiş. Ma nînan bi awayo aşkere vanî. Hemverê nînan çare berdewamîya têkoşînadayîşî yo. Lazim o cayo ke ma tedeyî têkoşîna demokratîk ma hîna girdêr bikerî. Ma seyî HDPî vanîy ke ravêrey kamder hetî ra şona wa bişêro ma do semeda persgirêkanê ciwan û cenîyan mîyanê gêrayîşê çareyî de bibî. Ma bi israr vanîy ke Erdogano ke serektî wazeno ma do to serek nêdanî kerdiş. Demokrasî, seyyewbînanî û edaleta ke nêy merdimanê no welatî rê lazim bena do no erdan de dest pê bikero.”
WAN - JINHA