Verîya di rojan Fermandarê pêroyin ê Meclîsî Abdulsettar El Çadir ronayişê Meclîsa Leşkerî ê Cerablûs, bakurê Minbic de îlan kerd. El Çadir aşkere kerd ke ê pawitişê şarê mintiqe zey wezîfeyê xo yê sîyasî û exlaqî vînenê. El Çadirî da zonayen ke iyê dê cewab bidê pêrokîn êrişan û komê bi tifîngînî ke goreyê fermanê Tirkîye hereket kenê zî aya kerdbi.
Ajananê tirk El Çadir kişt
Badê na îlan, ajanê dewleta tirk û çeteyê ci kewtî hereketî û bi suîkastekê Fermandarê Meclîsa Lejkerî ê Cerablûs Abdulsettar El Çadir kiştî. Badê êrişî, 2 azayê îstixbaratê tirk tepêşîyay. Vizêr zî Meclîsa Lejkerî ê Cerablûs eşkere kerd ke, înan kiştoxê fermandarê xo tepişto.Meclîsî da zonayen ke senî ke înan kiştoxî tepiştê, iyê xeyalanê fermandaranê xo zî biyarê ca û Cerablûs azad bikerê. Heto bîn ra Quwetanê Surîye yê Demokratîk zî, destegê xo ê seweta Meclîsa Lejkerî ê Cerablûs ard ziwan. Quwetanê Suriye Demokratîk eleqe ant hesab û plananê leymin (qilêrîn) ê dewleta tirk ser û quwetanê koalîsyonê maben-netewî ra wast ke, goreyê soz û vatişanê xo hereket bikerê.
Hesekê de adirbirnayiş
Hesekê de badê lejê 7 rojan vizêr adirbirnayin îlan bi. Goreyê adirbirnayişî quwetê rejîmî û çeteyê ci, sûk ra vejenê û quwetê Asayişê Rojawa miyanê sûk ra mesûl benê.
Sûka Kantona Cîzîre Hesekê de, 16ê Tebaxe ra heta vizêr mabenê quwetanê pawitinê Rojawa û rejîmê Baas de lej û pirodayişê giran estbî. Quwetanê YPG û Asayişî lejê 7 rojan de, darbeyê girdî day quwetanê rejîmî û çeteyanê ci ro û cayê tewr muhîm û stratejîkî, quwetanê rejîmî ra girotî. Bi desan lejkerê rejîmî û çeteyê ci kişîyay. Vêşiyê 200 lejkerî esîr girotiyay. Tewr peynî de başûrê laya Habur de, quwetanê rejîmê Baas ra kerd pak.
Hesekê de zî vizêr pirodayişî vindîyay. Tayî çormeyê rîspî û eşîrê ereb kewtî dewre û wastî ke lej vinderîyo. Ser na waşten vizêr adirbirnayiş îlan bi. Şertê tewr muhîm ê adirbirnayiş zî no yo ke quwetê rejîmî û çeteyê ci, sûk ra vejiyê û ewleyîye sûk qontrolê Asayişê Rojawa de bimano.
NAVENDÊ XEBERAN