Karayilanî vist vîrî ke DAIŞ behaneyo, hedefê esasî kurdî yê. Murat Karayilanî da zonayen ke AKP û DAIŞ pê kerd û va ser pêkerdişî DAIŞ Cerablûs û xeta vera Ezaz kena veng. Yanî wija de operasyon nêbi, dest vurnayiş bi. Karayilan El Nûsra û DAIŞ zey pê hesibna û wina va: “Tenya al vurnîya. Werte lejekê çîno.Pêkerdî û ca vurnay. Xeberê zey lej vejîya, zûrê girdî yê.”
Emrê DAIŞ kenê derg
Karayilanî vera kayanê dewleta tirk bi nê vatenan quwetanê Awrûpa aya kerdî: “Eno pêkerdişê dewleta tirk û DAIŞ, tewr vêşî tesîrê xo do ser Awrûpa bikero. Bi no pêkerdişî raya DAIŞ a ke şina Awrûpa û dinyay, girotiya bin garantî. No pêkerdiş do emrê DAIŞ derg bikero. Çimkî DAIŞ dî, badê Minbic azad bi, hinî nêşena verniyê QSD bigîro. Coka çarçoweyê menfeatanê xo de pêkerd û wija ra anciya.”
Azayê Komîteyê Rayverîn ê PKK Murat Karayilanî da zonayen ke rayverîna Emerîka pêkerdişê Tirkîye û DAIŞ qebûl kerd û rexne kerd. Karayilanî aşkere kerd ke Emerîka şaşîyeke gird kerd. No şaşîyê ci zî do zerarê tewr girdî bido Awrûpa û Rûsya. Karayilanî vist vîrî ke Tirkîye bi dekewtişê Cerablusî ra pîya hinî biyayişê xo yê Surîye fermî kerd û wina va: “Hedefê Tirkîye DAIŞ nîyo. Xo ra Erdoganî bi xo zî eşkere kerd ke hedefê înan kurdê Surîye yê. Tirkîye dî ke Surîye de îmkanê ronayişê Federasyonî vejîyayo werte. Şar û kulturê cîya, rayverînê xo ronenê. Kurdî zî winî kenê. Dewleta tirk vana ‘wa Surîye bibo federasyon, la tede kurdî nêbê.’
Êrişî vera heme kurdan ê
Karayilan'î êrişê vera Cerablus zey êrişê vera heme kurdan hesibna û va: “Ganî kurdî vera nê êrişan vengê xo vejê. Goreyê dewleta tirk, eke kurdî Surîye de statu bi dest bifînê, kurdê Bakurî zî dê biwazê. La belê Rojawa de kurdî bibê wayirê statu zî û nêbê zî, Bakurê Kurdistanî de, tekoşîn serva statu bîyo gird. Rojawa de zî, çi beno wa bibo, zey ke Kurdistanijan vat, bê statuyî nêbeno. Êrişê dewleta tirk ê Rojawa, hem Bakur û hem zî Başûr tesîr kenê. Coka lazimo pêrokîn kurdî aya bê û winî hereket bikerê.
ANF/BEHDÎNAN