Aktivîstê heqê merdiman û çormeyê demokratîk yê ke vejiyay meydanan polîtîkayanê herb yê AKP ra vatî beso. Dersim ra heta Enqera, Elezîz ra heta Stenbol sloganê haşitî berz bî.
Dersim de gencan ra nûmayis
Dersim de gencan seweta protestokerdişê ‘qedexe’ yê vetişê teber yê dewlet sanê sêsem de, nûmayisa protestoyî virastî. Gencan Meydanê Azadî de ray trafikî rê girotî û hayr antî ‘qedexe’yan ser. Gencan sloganê ‘Dersim îsyan o, Kurdistanî rê selamo’, ‘Alwoz Şerdil nêmerdo’, ‘kiştox dewlet Kurdistan ra def bi’ berz kerdî.
Polîsê ke bi TOMA’yan şî cayê nûmayiş mudaxaleyê gencan kerdî. Nûmayişkaran kî bi kemer-sîyan cewab day êrişê polîsan. Peycoy gencan barîqatî nay ro û bi polîsan day piro. Ser nay polîsî peyser anciyay.
Bismîl paşt da Sûr
Qezaya Amed Bismîl de zî verra polîtîkayanê herb yê AKP nêrazîbiyen damûsniya. Bi hezaran kesê ke ver bana DBP yê qeza de amey pêhet waştî ser ceddeyê îstasyon ra rayşirê.Polîsan verniya şêligî girotî û nêviraday rayşirê. Ser nay hemserokê DBP yê qeza Abdulsemet Bîçîm’î damûstayin da û sereştişanê dewlet yê Kurdistan rê hêrsê xo damûsna. Bîçîm’î aşkere kerd ke, ê dê verra êrişan bêveng nêmanê. Badê damûstayin xeylê cayanê qeza de nûmayişî viraziyay. Gencê ke vejiyyay mehleyan xeylê cayan de barîqatî ronay û rayan şiyîn û ameyin ra girotî.
Elezîz îdareyê xoser silamî kerd
Teror û ablûqayê dewlet Elezîz de zî hetê azayanê KESK protesto bi. Welatijê ke Garajê Xozat de are bî, panqartê ‘îdareyê xoser silamî keme’, ‘bi îdareyê xoser hetê ameyina azad’ akerdî. Qiseykerdoxê KESK yê Elezîz Alî Erdem nûmayiş de qisey kerd û vistvîrî ke, nika hiqûqa herb dewre de ya. Erdem’î ard ziwan ke, eke hikûmeta AKP niya dewam bikero, tirkiye do açarniyo sûriye.
Herbê AKP qezaya Mêrdîn Qoser de zî ame protesto kerdin. Nûmayişa ke hethe azayanê Egitim-Sen viraziya, DBP, HDP, KESK û DİSK zî paşt da. Nûmayişa ke panqarta ‘qetlîam û ablûqa rê nê’ abiya de AKP amê îqaz kerdin. Wan de zî azayanê platformê şûbeyê KESK yê Wan zî bi eskerakerdişê çapemenî êrişanê dewlet protesto kerdî.
DÎHA
Sûkanê tirkiye paşt da kurdistan
Tenya sûkanê kurdistan de nê, sûkanê tirkiye de zî verra ablûqa û terora dewlet vengê welatijan berz beno.
Manîsa ra heta Enqera AKP raştê nêrazîbiyenan amê
Konseptê herb yê AKP Enqera de hetê DÎSK, KESK, TMMOB, Îzmîr de hetê qûwetanê emeg û demokrasî, Stenbol de hetê Komeleya heqê merdiman, Edene de hetê qûwetanê demokrasî û emegî, Antalya de hetê platformê şûbeyê KESK yê Antalya û Manîsa de hetê KESK ame protesto kerdin. Nûmayişan de hikûmeta AKP ra waziya ke desinde ablûqayê verra Kurdistan hewado. Herzewbîn mesajê paştdayinê Kurdistan amê dayen.
Tenya sûkanê kurdistan û tirkiye de nê, herzewbîn xeylê sûkanê welatanê Awrûpa ra zî verra terora dewlet nêrazîbiyenî benê berz. Nûmayişan de AKP ra waziyeno ke desinde peyniya teror û ‘qedexe’yan biyaro.